Yevropa ittifoqi mintaqalarda aholini qo‘llab-quvvatlash uchun O‘zbekistonga 25 mln yevro ajratadi

2018 yilning 21 noyabr kuni Bryussel shahriga amaliy tashrif bilan kelgan O‘zbekiston Respublikasi tashqi ishlar vaziri Abdulaziz Komilov bugun Yevropa ittifoqining Xalqaro hamkorlik va rivojlanish masalalari bo‘yicha komissari Neven Mimitsa bilan uchrashdi.

TIV xabariga ko‘ra, suhbat chog‘ida O‘zbekiston va Yevropa ittifoqi o‘rtasidagi ko‘p qirrali hamkorlikni, jumladan «Markaziy Osiyo – Yevropa ittifoqi» shaklidagi aloqalarni yanada rivojlantirishning amaliy jihatlari muhokama qilindi.

Uchrashuvda siyosiy, savdo-iqtisodiy, investitsion, madaniy-gumanitar va boshqa sohalardagi ikki tomonlama hamkorlikning dinamik va samarali ko‘rinishi mamnuniyat bilan qayd etildi. Xususan ta'lim va kadrlar tayyorlash sohasidagi ijobiy o‘zgarishlar kuzatilmoqda, shu nuqtayi nazardan O‘zbekistonda «Xususiy huquq» va «Tibbiyot» kabi mutaxassisliklarda Yevropa OTMlari filiallari tarmog‘ini oshirish istiqbollari muhokama qilindi.

Uchrashuvda umumiy kun tartibidagi boshqa masalalar ham ko‘rib chiqildi.

Shu kunning o‘zida O‘zbekiston delegatsiyasi tashrifi doirasida umumiy byudjyeti 25 mln yevro bo‘lgan «Chorvachilik sektorini rivojlantirish», «Adliya organlari tomonidan respublika mintaqalarida ko‘rsatiladigan davlat xizmatlari sifatini yaxshilash» loyihalarini Yevropa ittifoqi tomonidan moliyalashtirish to‘g‘risidagi bitimlar imzolandi.