Britaniya Petrov va Boshirov Solsberida bo‘lganini isbotlovchi yangi videolarni e'lon qildi

Skotland-yard London GRU sobiq polkovnigi Sergey Skripalning zaharlanishiga aloqador deb hisoblaydigan Aleksandr Petrov hamda Ruslan Boshirovning ushbu shaharda bo‘lganiga oid yangi videoyozuvlarni e'lon qildi. Shuningdek, zaharlovchi modda bo‘lgan flakon fotosurati ham joylashtirildi. Materiallar Britaniya politsiyasi veb-saytida mavjud.

Politsiya saytida aytilishicha, roliklarda Petrov va Boshirovning Solsberiga kelishi, so‘ng shahar bo‘ylab harakatlanishi tasvirlangan. Ta'kidlanishicha, yozuvlar shu yilning 4 mart kuni olingan.

Bundan tashqari, Britaniya politsiyasi asab-falajlovchi modda bo‘lgan atir uchun soxta idish - flakonning bir nechta fotosuratini e'lon qildi. Londonning fikricha, u yerda «Novichok» zahari bo‘lgan, rasmiy Moskva bu modda Rossiya va sobiq SSSR davlatlari hududida ishlab chiqarilganini bir necha marta rad etib chiqdi.

Saytda qayd etilishicha, Skripallar ishi bo‘yicha tergov davom etmoqda.

Eslatib o‘tamiz, avvalroq Yuliya Skripalning qallig‘i yo‘qolib qolgani xabar qilingandi.