Parijda politsiya va «sariq jiletlar» o‘rtasida to‘qnashuvlar boshlandi. Namoyishlar uch haftadan beri davom etmoqda

1 dekabr kuni Parijda politsiya va yoqilg‘i narxlarining ko‘tarilishiga qarshi bo‘lgan «sariq jiletlar» o‘rtasida yangi to‘qnashuvlar ro‘y berdi. 

Politsiya olomonga qarshi ko‘zdan yosh sizdiruvchi gaz qo‘lladi. Namoyishchilar politsiyachilarga sariq bo‘yoqlar otishgan. 60 kishi qo‘lga olindi, deb xabar bermoqda Reuters.

To‘qnashuvlar namoyishlarning rasmiy boshlanishidan avval yuz berdi, deb yozmoqda BBC News. Namoyishchilar Yelisey maydonlariga kirishni to‘sib qo‘ygan barrikadalarni olib tashlashga urinishdi.

Fransiyada noyabr oyi o‘rtalarida yuz minglab odamlar ishtirokida «sariq jiletlar» namoyishlari boshlandi. Faollar benzin narxlarining ko‘tarilishiga qarshi chiqib, yo‘llarni to‘sib qo‘yishdi. Namoyishlar paytida ikki kishi halok bo‘ldi, yuzlab odamlar jarohat oldi.