Armaniston bosh vaziri vazifasini bajaruvchi Nikol Pashinyanning “Mening qadamim” bloki, “Farovon Armaniston” va “Shavkatli Armaniston” partiyalari mamlakatda o‘tgan parlament saylovlarining dastlabki natijalariga ko‘ra mamlakatning yangi parlamentiga o‘tdi.
2010 ta saylov uchastkasining 1802 tasidan olingan byulletenlar qayta ishlangandan keyin “Mening qadamim” bloki 70,45 foiz, “Farovon Armaniston” 8,37 foiz va “Shavkatli Armaniston” partiyasi 6,37 foiz ovoz to‘plagan.
Mamlakat tarixida muddatdan avval parlament saylovlarida ilk bor 2 ta blok va 9 ta partiya ishtirok etdi. Partiya parlamentga o‘tishi uchun 5 foizdan ko‘proq, blok esa 7 foizdan ko‘proq ovoz to‘plashi kerak edi. Armaniston qonunchiligiga ko‘ra, parlamentda kamida 3 ta siyosiy kuch taqdim qilingan bo‘lishi kerak.
