Messining penaltidan xavfli jarimalari va Beylning qaytishi. Ispaniyada tur voqealari

Dam olish kunlarida Ispaniya chempionatida 15-tur uchrashuvlari o‘tkazildi. Bu o‘yinlardan keyin «Barselona» birinchi o‘ringa, «Real» kuchli to‘rtlikka qaytdi. «Tribuna» turning asosiy o‘yinlari sharhini keltiradi.

«Espanol» - «Barselona» - 0:4 (0:3)
Gollar: Messi, 17 (0:1). Dembele, 26 (0:2). L.Suares, 45 (0:3). Messi, 65 (0:4).
«Espanol»: Diyego Lopes, Vila, Xavi Lopes, David Lopes, Duarte, Viktor Sanches, Darder (Granero, 74), Roka, Melendo (Serxio Garsiya, 63), Peres (Leu Baptistan, 59), Borxa Iglesias.
«Barselona»: ter Shtegen, Pike, Jordi Alba, Semedu, Langle, Rakitich (D.Suares, 82), Vidal, Buskets, Messi, L.Suares (El-Xaddadi, 79), Dembele (Koutinyu, 68).
Ogohlantirish: Vila, 79.
Hakam: del Serro Grande).
8 dekabr. Kornelya-de-Lobregat. RCDE Stadium (Power8) stadioni.

Eski tanishlar
«Jirona» La Ligada muqim o‘rnashayotgan bo‘lsada, keyingi yillarda bu ikki jamoa qarama-qarshiligi bir tomonning mutlaq ustunligida kechayotgan bo‘lsada, Kataloniyaning asosiy derbisi «Espanol» va «Barselona» bahsi bo‘lib qolaveradi. Qolaversa, ayni vaqtda «Espanol»ni boshqarayotgan Rubi 2013-14 yilgi mavsumda ko‘k-anorranglilar jamoasida murabbiylar shtabida bo‘lgan, «Barselona»ning hozirgi ustozi Ernesto Valverde esa 2006-08 yillarda «to‘tiqushlar» bosh murabbiyi sifatida ishlagan. Koutino 6 yil muqaddam bir mavsumni «Espanol»da ijara asosida o‘tkazgan. Bu safargi o‘yinni muxlislar eski tanishlarning qarama-qarshiligini entikish bilan kutmoqda edi.

Leoning golga tashnaligi

«Barselona» bu o‘yinga uchinchi formani tanladi. Odatda mehmon o‘yinlarida kiyiladigan sariq emas, atirgul rangidagi libos kiyildi. 

O‘yin boshlanganini bildiruvchi hushtak yangrashi bilanoq keyingi ikki o‘yinda maydonni golsiz tark etgan Messi bu o‘yinga o‘zgacha golga tashnalik bilan tushgani ko‘rinib turardi. «Espanol» mudofaasi esa uning ishtiyoqini yetarlicha to‘g‘ri baholay olmadi. Mezbonlar argentinalik futbolchini bir necha marta gazonga qulatgan bo‘lishsada, unga ko‘proq imkoniyatlar taqdim etishdi. Shunday qo‘polliklardan biridan keyin hakam jarima nuqtasini ko‘rsatdi - Messi ajoyib zarba bilan to‘pni darvoza to‘riga joyladi.

Tanaffusgacha hisob yiriklashib ketdi. Hujumlardan birida Messi raqibning 3-4 himoyachisi bilan to‘p uchun kurashda ustun kelib, Dembeleni qulay vaziyatga chiqardi va fransuz futbolchisi imkoniyatini ko‘kka sovurmadi.

«Barsa» shundan keyin ham qator xavfli hujumlar uyushtirdi, Rakitich va Messida bittadan qulay imkoniyat bo‘ldi, xorvatiyalik futbolchining bosh bilan bergan zarbasini Diyego Lopes qaytarib qoldi, Messining zarbasi darvoza ustuniga tegdi. Ammo baribir birinchi bo‘lim oxirida uchinchi gol urildi - Suares to‘p uchun kurashda raqib himoyachisidan ustun kelib, zarba berish nuqtasiga chiqdi va to‘pni Lopesning oyoqlari orasidan o‘tkazdi.

«Espanol» bu gollardan keyin ham kurashni davom ettirish uchun o‘zida kuch topa oldi va ikkinchi bo‘limda qator hujumlar uyushtirdi. Ammo Messi yana bir marta jarima nuqtasidan qaytarib bo‘lmas zarba yo‘lladi va mezbonlarda ortiq imkoniyat qolmadi.

31 yoshli argentinalik futbolchi La Liga tarixida ketma-ket 13 mavsumda 10 va undan ortiq gol urgan ilk o‘yinchi bo‘ldi. Bunday natijani avval hech kim qayd eta olmagan. Messi ayni damda La Liga to‘purarligini «Jirona» hujumchisi Kristian Stuani bilan bo‘lishib turibdi. Stuani hisobida ham 11 ta gol mavjud.

Leo faoliyatida ilk marta La Liganing bir o‘yinida 2 marta jarima zarbasini golga aylantirdi. 2018 yilda Messi jarima zarbalaridan 9ta gol urib ulgurdi. Bu Yevropa Ligalaridagi istalgan klubning natijasidan yaxshiroq. Leo endi futbolchilar bilan raqobatlashishdan charchadi va butun klublarni o‘ziga raqib qilmoqda va ulardan ustun kelmoqda. Shunisi aniqki, uning jarima zarbalari penaltidan ham xavfliroq.

Kataloniya poytaxtida hali ham yakkahukmronlik davom etadi.

«Ueska» - «Real» - 0:1 (0:1) 
Gol: Beyl, 8.
«Ueska»: Yovanovich, Miramon, Insua Blanko, Echeyta, Pulido, Rivera, Xuan Agilera (Melero, 19), Moyses Gomes, Ferreyro (Serdar Gyurler, 76), Avila (Longo, 84), Kucho.
«Real»: Kurtua, Odriosola, Varan, Serxio Ramos, Karvaxal, Modrich (Isko, 66), Lorente, Sebalos (Valverde, 58), Vaskes, Benzema, Beyl (Asensio, 76). 
Ogohlantirishlar: Karvaxal, 26. Sebalos, 39. Echeyta, 42. Insua Blanko, 80. 
Hakam: Melero Lopes.
9 dekabr. Ueska. El Alcoraz stadioni.

Joriy mavsum debyutanti bo‘lmish «Ueska» mavsumni «Eybar» ustidan safarda qozonilgan g‘alaba (2:1) bilan boshlagandi. Keyinroq «Eybar» «Real»ni shu maydonda yirik hisobda taslim etdi (3:0). «Ueska» esa shu bo‘yi, 13 tur davomida bitta ham g‘alabaga erisha olmadi. Aragonliklar bu o‘yinlarda 4 marta durang o‘ynab, jami 7 ochko bilan turnir jadvalining oxirgi o‘rnida qolishgan. 

«Real» bilan o‘yin istalgan jamoa uchun sinov. «Ueska» uchun bu «Real» bilan ilk to‘qnashuv edi. Santyago Solari jamoasi Eybardagi sharmandali mag‘lubiyatdan keyingi 3ta o‘yinda ham g‘alaba qozondi, to‘plar nisbati - 10:1. Bu natijalar evaziga jamoa yuqoriga intila boshladi.

O‘yinning 8-daqiqasidayoq Garet Beyl Odriosolaning pasini bir teginishda darvozaga yo‘lladi. Bu uelslik futbolchi uchun La Ligada 1 sentabrdan urilgan birinchi gol bo‘ldi. U jarohatidan qaytishini gol bilan nishonladi.

Jiddiy qarshilik
Qayd etish kerakki, o‘tkazilgan tezkor gol maydon egalarining ruhini sindirmadi. Aragonliklar tezda hisobni tenglashtirish uchun oldinga tashlanishdi. Ammo Avilaning kuchli va aniq zarbasini Kurtua bartaraf etdi. Maydon egalari birinchi bo‘lim oxirida bosimni kuchaytirishdi, ikkinchi bo‘lim boshi ham maydon egalari ustunligida o‘tdi. Vaziyatlardan birida Meleroning kuchli zarbasi darvoza to‘sinidan qaytdi, Ferreyro belgiyalik darvozabon bilan yakkama-yakka vaziyatga chiqib borib, gol urolmadi.

📛 THIBAUT COURTOIS 📛

Fine stop from the in-form @realmadriden 'keeper! 😎#HuescaRealMadrid pic.twitter.com/8heobeefqL

— LaLiga (@LaLigaEN) 9 dekabrya 2018 g.

Yovanovichning benefisi

Maydon egalarining hujumlarini sabot bilan qaytarib turgan madridliklar ikkinchi bo‘lim o‘rtalarida yana nazoratni qo‘lga ola boshlashdi. Beylning ikki zarbasini mezbonlar darvozaboni Yovanovich qaytarib qoldi. Dublni rasmiylashtirish uchun urinishlari behuda ketgan Beyl o‘z o‘rnini Asensioga bo‘shatib berdi. Uning ketishi bilan «Real» hujumlarida keskinlik pasaydi, o‘yin oxirida mezbonlar tinimsiz hujumlar uyushtirishdi, ammo to‘p mehmonlar darvozasiga kirishni istamadi. «Real» autsayderga qarshi o‘yinda qiyin g‘alabaga erishdi, lekin bu ochko jamoani to‘rtinchi o‘ringa olib chiqdi. Aragonliklar esa bu mavsum yakunida yana Segundaga qaytishi haqiqatga yaqin.

«Atletiko» – «Alaves» – 3:0 (Kalinich, 25. Grizmann, 82. Rodri, 87)

«Matraschilar» Diyego Kostani bir necha oy muddatga yo‘qotdi, Kalinich esa bu vaziyatda o‘zini ko‘rsatishi mumkin edi. Xorvatiyalik futbolchi Diyego Simeonening ishonchini oqladi - birinchi bo‘lim o‘rtalarida Ariasning pasidan unumli foydalanib, La Ligada birinchi golini urdi.

Bu nafaqat futbolchining o‘zi uchun, balki klub uchun ham ruhiy jihatdan yaxshi holat bo‘ldi. «Atletiko» ham 4 o‘yindan buyon birinchi bo‘limda gol ura olmay kelayotgandi.

Bu tur arafasida to‘rtinchi o‘rinda bo‘lgan «Alaves» «Real»ni oldinga o‘tkazib yuborish xavfi ostida qoldi va ikkinchi bo‘limda to‘liq kuch bilan oldinga tashlandi. Ammo Grizmann qarshi hujumda muvaffaqiyatli harakatlanib, mehmonlarning umidini so‘ndirdi. Qo‘shimchasiga Rodri uchinchi golni urdi. Endi «Atletiko» ikkinchi o‘rindagi «Sevilya»ga yetib oldi. Bu turda «Valensiya» mehmoni bo‘lgan «Sevilya» 90+2 daqiqada gol o‘tkazib yuborib, g‘alabani qo‘ldan chiqardi.

Tur o‘yinlari

Eybar – Levante 4:4 (1:2, 3:2)
Gollar: 1:0 – 8 Enrik, 1:1 – 9 Morales, 1:2 – 25 Rober, 2:2 – 57 Eskalante, 3:2 – 61, penalti Sharles, 4:2 – 65 Sharles, 4:3 – 75, avtogol Paulu Oliveyra, 4:4 – 90 Mayoral.

Real Sosedad – Valyadolid 1:2 (0:1, 1:1)
Gollar: 0:1 – 16 Toni, 0:2 – 54 Antonito, 1:2 – 62 Oyarsabal.

Betis – Rayo Valekano 2:0 (0:0, 2:0)
Gollar: 1:0 – 59, penalti Lo Chelso, 2:0 – 76 Sidney.

Leganes – Xetafe 1:1 (0:1, 1:0)
Gollar: 0:1 – 39 Kabrera, 1:1 – 64 Nom.
Chetlatish: Peres (90).

Valensiya – Sevilya 1:1 (0:0, 1:1)
Gollar: 0:1 – 55 Sarabiya, 1:1 – 90 Diakabi.

Vilyarreal – Selta 2:3 (0:1, 2:2)
Gollar: 0:1 – 44 Brais Mendes, 0:2 – 49 Yokushlu, 0:3 – 51 Maksi Gomes, 1:3 – 83 Bakka, 2:3 – 87 Bakka.

*«Atletik» va «Jirona» uchrashuvi bugun bo‘lib o‘tadi

Turnir jadvali