Tramp Meksika bilan chegarada «badiiy bezak qilingan» devorni va'da qildi

AQSh prezidenti Donald Trampning ma'lum qilishicha, Meksika va Qo‘shma Shtatlar chegarasida «badiiy bezak qilingan» devor o‘rnatiladi. Bu haqda u tvitterdagi sahifasida yozgan.

Trampning eslatishicha, demokratik partiyadan bo‘lgan raqiblari Amerika Qo‘shma Shtatlari va Meksika chegarasida «beton devor» qurilishini xohlashmayapti. Prezidentning qayd etishicha, devor betondan emas, balki metalldan bo‘ladi.

«Biz badiiy bezaklarga ega po‘lat reykalardan devor qurmoqdamiz», - deb yozgan Tramp.

Shuningdek, uning ta'kidlashicha, shunday devor orqali Meksika yaxshi ko‘rinadigan bo‘ladi.

Trampning xulosa qilishicha, devor AQSh fuqarolari «loyiq» bo‘lgan xavfsizlikni ta'minlab beradi.

Eslatib o‘tamiz, avvalroq AQSh prezidenti Donald Tramp Meksika bilan chegarada devor qurilishiga xarajatlar noqonuniy migratsiyadan yo‘qotiladigan mablag‘lardan 10 marta kamroq bo‘lishini ma'lum qilgandi.