Interpol sobiq rahbarining rafiqasi Fransiyada boshpana so‘radi 

Interpolning sobiq rahbari, hozirda Xitoyda tergov qilinayotgan Men Xunveyning rafiqasi Fransiyada boshpana berilishini so‘radi. Bu haqda France Info radiostansiyasi xabar berdi. 

“Fransiya hukumati meni himoya qilishi, menga va farzanddlarimga yordam berishi kerak”, deb aytgan Greys Men.

Ayolning aytishicha, 2018 yil kuzida uni o‘g‘irlab ketishmoqchi bo‘lishgan. Uning ma'lum qilishicha, oktyabrda uning yoniga ikki xitoylik tadbirkor kelib, unga ular bilan birga Chexiyaga xususiy samolyotda uchishni taklif qilgan. Greys Menning ta'kidlashicha, xitoyliklar ikki kundan keyin yana kelib, unga bu gal Yevropa shaharlari bo‘ylab turga jo‘nashni taklif qilishgan. Ayol ularga rad javobini bergan.

“Shu urinishdan keyin politsiyani ogohlantirdim”, deb ma'lum qilgan ayol.

Bundan tashqari, Xitoyning Liondagi konsulligi unga turmush o‘rtog‘idan xat borligini, biroq uni olish uchun ayolning shaxsan o‘zi kelishi kerakligini xabar qilgan. Ayol maktubning Fransiya politsiyasi orqali berilishini so‘ragan, biroq u ushbu iltimosiga Xitoy tomonidan javob olmagan.

Fransiya OAV ma'lumotlariga ko‘ra, Greys Men hozirda Interpol bosh qarorgohi joylashgan Lionda qolmoqda.

Oktabr boshida Fransiyada Men Xunveyning yo‘qolib qolishi yuzasidan tergov boshlangan. Uning yo‘qolib qolgani haqida rafiqasi ma'lum qilgan. 

Keyinroq Xitoy tomoni Men Xunvey Xitoyda korrupsiya ishi bo‘yicha tergov ostida ekanligini ma'lum qilgan.  

Men Xunvey 7 oktyabrda Interpol prezidenti lavozimidan ketishini ma'lum qilgan.