Hafta o‘yinlari anonsi. «Siti» «Arsenal»ga qarshi, «MYu» jiddiy sinov arafasida
|16:20 / 02.02.201917 83714 min
Dam olish kunlarida Yevropa chempionatlarida navbatdagi tur uchrashuvlari bo‘lib o‘tadi. «Tribuna» shanba va yakshanba kunlarining asosiy uchrashuvlari anonsini taqdim etadi.
BARSeLONA – VALeNSIYa (2 fevral, 22:30)
Ispaniyada, agar «Barselona»ning ishonchli seriyasini ham e'tiborga olsak, chempionlik intrigasi qolmadi hisob. Kataloniyaliklar La Ligada oxirgi marta 11 noyabr kuni mag‘lubiyatga uchrashgan. Ispaniya Kubogida esa Valverde jamoasi javob o‘yinida talofatni bartaraf eta olishmoqda. Sevilyadagi 0:2 hisobidagi omadsiz o‘yin «Kamp Nou»dagi 6:1 hisobi bilan mantiqiy yakun topdi. Ayniqsa, so‘nggi nuqtani qo‘ygan Messining goli rosa tomosha qilishga arziydi, ko‘rmagan bo‘lsangiz, ko‘rib oling.
Aynan mana shunday o‘yinlar va gollar tufayli biz «Barselona»ni tomosha qilaveramiz, Bu safar raqib – «Valensiya», o‘z tarixiga ega, uzoqqa bormaylik, jamoa shu yili ham Chempionlar Ligasida qatnashdi. Valensiyaliklar juda yaxshi kayfiyatda Barselonaga tashrif buyurmoqda. «Ko‘rshapalaklar»ning Ispaniya kubogidagi so‘nggi bahsi yanada dramatik kechdi.
Marselino shogirdlari «Xetafe»ga safar o‘yinida 0:1 hisobida yutqazishgandi. Javob o‘yinida esa, ilk soniyalaridayoq gol o‘tkazib yuborishdi. Endi «Valensiya»dan uchta gol urish talab etilardi. 61-daqiqada Rodrigo hisobni tenglashtirdi. Keyin esa, hakam tomonidan qo‘shib berilgan daqiqalarda Rodrigo yana ikkita gol urib, jamoasi g‘alabasini ta'minladi.
«Barselona» bilan o‘yinga qaytadigan bo‘lsak, 2016 yilning aprelida «Valensiya» «Kamp Nou»da g‘alaba qozonishning uddasidan chiqqandi. Shundan beri 7 o‘yinda «Valensiya» g‘alaba qozona olmay kelyapti, faqat «Mestalya»da ikki bor durang qayd etildi, xolos. Jami bo‘lib, oxirgi 20 o‘yinning 12tasida «Barselona»ning qo‘li baland kelgan. Shuningdek, kataloniyaliklarning bugungi ustozi Ernesto Valverdening ham murabbiy sifatida «Valensiya»ga qarshi shaxsiy seriyasi bor – 9 mag‘lubiyatsiz o‘yin.
Tarkiblar borasida jarohat olgan Usmon Dembeledan tashqari, diskvalifikatsiya tufayli Serxio Buskets ham jamoasiga yordam bera olmaydi. «Valensiya»da esa, ahvol ancha og‘irroq. Ezikiyel Garay, Fransis Koklen, Jofri Kondogbiya, Xaver Ximenes – barchasi asosiy tarkib o‘yinchilari va ular Marselinoga bugun yordam bera olishmaydi. Gonsalo Guedesh mashg‘ulotlarga qaytgan bo‘lsa ham, hali qanday holatda ekani ma'lum emas.
LeSTeR – MANCheSTeR YuNAYTeD (3 fevral, 19:05)
Mavzuga oid
Ole-Gunnar Sulsherning Manchesterdagi g‘alabali seriyasi nihoyasiga yetdi va endi, jamoaning bu holatga qanday reaksiya berishi qiziq. Mourino ketishidan so‘ng hosil bo‘lgan pozitiv muhit inersiyasi edimi yoki rostan ham murabbiy «MYu» o‘yinini tubdan o‘zgartirdimi? Lesterdagi o‘yin mana shu muhim savolga javob beradi va aytish mumkinki, Chempionlar Ligasi o‘rinlari uchun katta ahamiyatga ega.
«Lester» esa, mana shunday sinov uchun juda munosib jamoadir. «Tulkilar» biroz beqaror bo‘lishsa-da, salohiyat jihatidan har qanday natijani kutish mumkin. «Manchester Siti» va «Chelsi» ustidan qozonilgan g‘alabalarga ko‘p bo‘lmadi, o‘tgan turda esa, «Liverpul» chempionlik poygasida ilgarilab ketishiga yo‘l qo‘yilmadi. «Yunayted» bilan o‘yin ham mezbonlar uchun o‘ziga xos ahamiyatga ega bo‘ladi.
O‘zaro o‘yinlarga kelsak, «MYu»da «Lester»ga qarshi ancha ijobiy seriya bor. Esingizda bo‘lsa, to‘rt yil oldin Lui van Gaal boshchiligidagi «iblislar» Lesterda 3:1 hisobida oldinda borib, yakunda o‘yin 5:3 hisobida mezbonlar g‘alabasi bilan tugagandi. Bu «kambek» «Lester»ning APLda «MYu» ustidan qozongan so‘nggi va yagona g‘alabasi bo‘lib turibdi. O‘tgan yili shu stadionda o‘tgan o‘yin ham ancha qiziqarli kechgan – so‘nggi daqiqalarda Maguayr tomonidan urilgan gol «Lester»ni mag‘lubiyatdan qutqarib qolgandi.
Yana bir qiziq jihat, agar «MYu» g‘alaba qozonadigan bo‘lsa, bu jamoaning safardagi qatorasiga beshinchi g‘alabasi hisoblanadi. Bunday natijaga klub oxirgi marta 2012 yilda, ya'ni Aleks Fergyuson davrida erishgandi.
Tarkiblarga nazar tashlasak, mashg‘ulotlardagi jarohat tufayli «Byornli»ga qarshi o‘ynay olmagan Antoni Marsiyal safga qaytdi. So‘nggi o‘yinni biroz oqsoqlanib tark etgan Pol Pogba ham so‘nggi xabarlarga qaraganda, o‘yinga tayyor. Mezbonlar tarkibida faqat Daniyel Amarti jamoadoshlariga yordam bera olmaydi. Uning maydonga qaytishi shu oyning oxiriga mo‘ljallangan.
MANCheSTeR SITI – ARSeNAL (3 fevral, 21:05)
O‘tgan tur ingliz top-klublari uchun juda og‘ir keldi. Faqat «Arsenal» va «Tottenhem» o‘z o‘yinlarini qiyin g‘alabalar bilan yakunlay oldi xolos. Ayniqsa, autsayder maydonida kutilmaganda, uch ochko yo‘qotgan «shaharliklar»ga juda alam qilgani aniq. Ma'lum bo‘lishicha, Pep Gvardiolaga bu mag‘lubiyat juda qattiq ta'sir qilgan va o‘yindan keyin yarim soatdan ko‘p vaqt davomida futbolchilarni kiyim almashtirish xonasida ushlab turgan. Aytishlaricha, Pepga shogirdlarining mezbonlarga yetarlicha bosim ko‘rsata olishmagani yoqmagan.
Ularning baxtiga, «Liverpul» ham bu turda ochko yo‘qotdi, Klopp jamoasi «Lester» bilan safarda 1:1 hisobida durang o‘ynadi va mag‘lubiyat «Siti» uchun kamroq talofat bilan o‘tdi. Ammo keyingi o‘yinlarda jamoaning ochko yo‘qotishga haqqi yo‘q, taqvim esa, juda qiyin. Bir hafta ichida «Manchester Siti» «Arsenal» va «Chelsi» bilan o‘z maydonida, safarda esa «Everton» bilan o‘ynashi lozim. Bu o‘yinlardagi yuz foizli natijagina Gvardiola jamoasi chempionlik bahsini davom ettirishga imkoniyat yaratadi. Kevin de Bryuynening yo‘qligi ayniqsa, so‘nggi turlarda bilinyapti, jamoada yetakchilikni qo‘lga oladigan futbolchi yetishmayapti. «Manchester Siti» oxirgi 9 o‘yindan 4tasini boy berdi – taqqoslash uchun, undan oldingi 72 o‘yinda jamoa shuncha mag‘lubiyat alamini totgandi.
«Arsenal»ning ham o‘z kurashi bor. Emeri jamoasi «Chelsi» va «Manchester Yunayted» bilan birga kuchli to‘rtlik uchun kurashadi. Ancha tanaffusdan so‘ng, nihoyat bu safar «to‘pchilar» to‘rtlikka kirib olgan bo‘lsalar-da, raqiblar u qadar uzoq emas. Shuningdek, «Arsenal»ning so‘nggi yillarda «Manchester Siti»ga qarshi u qadar muvaffaqiyatli o‘ynay olmayotganini ta'kidlash kerak. «Etihad»dagi so‘nggi 11 o‘yinning 7tasida «Arsenal» ochkosiz maydonni tark etgan. Umuman, «Arsenal»ning safar o‘yinlari statistikasiga havas qilib bo‘lmaydi – so‘nggi 19 o‘yinda 11 mag‘lubiyat.
Tarkibdagi yo‘qotishlar borasida mehmonlarning, ayniqsa himoya chizig‘ining muammolari katta. Holding, Sokratis, Koselni, Ballerin kabi himoyachilar jamoaga yordam bera olishmaydi. Shuningdek, Uelbek mavsum oxirigacha safdan chiqqan, Mxitaryanning qachon tayyor bo‘lishi ma'lum emas. Mezbonlarda esa, Mendi va Kompani jamoaga yordam bera olishmaydi.
ROMA –MILAN (4 fevralga o‘tar kechasi, 00:30)
Hozirda turnir jadvalida qo‘shni bo‘lib turgan va Chempionlar Ligasi yo‘llanmasini beruvchi to‘rtinchi o‘rin uchun kurashayotgan bu ikki jamoa o‘yinga ikki xil kayfiyatda yetib kelishmoqda.
«Milan» – tushunarli, mamlakat kubogi bahsida «Napoli» ustidan so‘nggi besh yilda qozonilgan ilk g‘alabaga erishdi. Erishibgina qolmay, bu qay tarzda amalga oshirilgani ham muhim, Milanda yangi qahramon paydo bo‘lgandek. Jyenoadan tashrif buyurgan Kshishtof Pyontek debyut o‘yinida dublga erishdi va «Napoli» ustidan qozonilgan g‘alabaning bosh sababchisi bo‘ldi.
«Roma» esa, teskari kayfiyatda. So‘nggi haftada ikkita juda ayanchli uchrashuv o‘tkazishdi. Avvaliga «Atlanta»ga qarshi o‘yinda 3:0 hisobida oldinda borayotib, g‘alabani qo‘ldan chiqarishdi. Uch kun o‘tib, Italiya kubogi o‘yinida «Fiorentina»ga 1:7 hisobida mag‘lubiyatga uchrashdi. Izohga hojat yo‘q.
Safarda o‘tgan bu ikki o‘yin uchun muxlislardan uzr so‘rashning yagona yo‘li – «Milan»ni yutish bo‘ladi, albatta. Jamoalar o‘rtasidagi o‘yinlar doimo murosasizligi bilan e'tibor qozongan. Buni statistika ham ko‘rsatib turibdi – oxirgi 15 o‘yinning 6tasida «Roma», 5tasida «Milan»ning qo‘li baland kelgan.
LION – PSJ (4 fevralga o‘tar kechasi, 01:00)
Agar Fransiyaga murojaat qilib, «PSJ» o‘yinlariga ahamiyat qaratadigan bo‘lsak, albatta, «Lion»ga qarshi o‘yin parijliklarning eng qiyin o‘yinlari bo‘lsa kerak. Turnir jadvali, oralaridagi ochko farqidan qat'i nazar, «Lion» alohida o‘yinda, ayniqsa, o‘z maydonida top-klubga qarshilik qila oladi. Chempionlar Ligasida «Manchester Siti»ga qarshi tengma-teng o‘yinlar ham bunga dalil bo‘la oladi.
«PSJ» bilan Liondagi o‘yinlar statistikasi ham bu o‘yinning ancha shiddatli o‘tishiga dalolat qiladi. So‘nggi 6 o‘yinning 3tasida mezbonlar g‘alaba qozonishgan. Ayniqsa, o‘tgan mavsumdagi o‘yin ko‘pchilikning yodida bo‘lsa kerak. O‘shanda Memfis Depayning uzoq masofadan urgan goli so‘nggi daqiqalarda mezbonlarga g‘alaba olib kelgan edi. O‘zaro oxirgi 24 o‘yinning 16tasida Parij jamoasi ustun kelgan, 4 o‘yin durang bilan yakunlangan bo‘lsa, 4 o‘yinda «Lion»ning qo‘li baland kelgan.
Jamoalarning sport formasi borasida ham muammo yo‘q. «PSJ» umuman mavsumni bir tekisda o‘tkazmoqda. «Lion» esa chempionatda yetti o‘yindan beri mag‘lubiyatga uchragani yo‘q. Oxirgi uch o‘yinni g‘alaba bilan yakunladi.
Jarohatlar borasida «Lion»ning barcha yetakchilari safda. «PSJ»da uzoq muddatga safdan chiqqan Neymardan tashqari, Verrattining ham maydonga tushmasligi aniqroq. Bu o‘yindan bir hafta o‘tib «PSJ» Manchesterga, YeChLdagi muhim o‘yinga safar qilishini e'tiborga olsak, Tuxel Fransiya chempionati o‘yinlariga biroz yengilroq qarashni boshlashini taxmin qilish mumkin, zero turnir jadvalidagi holat va katta farq bilan ta'qibchilardan o‘zib ketilgani ham bunga imkoniyat beradi.
