Ko‘chmas mulk obektlariga bo‘lgan huquqlarni davlat ro‘yxatidan o‘tkazish bo‘yicha shikoyatlarni ko‘rib chiqish to‘g‘risidagi nizom tasdiqlanadi

Normativ-huquqiy hujjatlar loyihalari muhokamasi portalida “Jismoniy va yuridik shaxslarning ko‘chmas mulk obektlariga bo‘lgan huquqlarni davlat ro‘yxatidan o‘tkazish borasidagi arizalari va shikoyatlarini ko‘rib chiqish to‘g‘risidagi nizomni tasdiqlash haqida”gi hujjat loyihasi joylashtirildi.

Nizomga ko‘ra, ko‘chmas mulk obektlariga bo‘lgan huquqlarni davlat ro‘yxatidan o‘tkazishda yuzaga keladigan nizolarni sudgacha hal qilish maqsadida Qoraqalpog‘iston Respublikasi, viloyatlar va Toshkent shahar yer tuzish va ko‘chmas mulk kadastri davlat korxonalari huzurida komissiyalar tashkil etiladi, yuridik va jismoniy shaxslar Komissiyalarning xulosalaridan norozi bo‘lgan taqdirda, O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi huzurida Apellyatsion komissiyasi tashkil etiladi.

Komissiyaga har qanday manfaatdor jismoniy va yuridik shaxslar o‘zlarining ko‘chmas mulk obektlariga bo‘lgan huquqlarni davlat ro‘yxatidan o‘tkazish sohasida buzilgan yoki nizoli bo‘lgan huquqlari yoxud qonuniy manfaatlarini himoya qilish uchun murojaat etish huquqiga ega.

Har bir jismoniy yoki yuridik shaxs ro‘yxatga oluvchining harakatlari yoki harakatsizligi uning huquqlari va qonuniy manfaatlarini buzsa, uning bunday harakatlari yoki harakatsizligi ustidan sud organlariga yoki Komissiyaga shikoyat berish huquqiga ega.

Sud organlariga murojaat qilgan taqdirda jismoniy yoki yuridik shaxs komissiyaga yoki apellyatsion komissiyasiga murojaat qilish huquqidan mahrum bo‘ladi.

Komissiya tomonidan vakolatli organlarning huquqni belgilovchi hujjatlar berilishining (qabul qilinishining) qonuniyligi bilan bog‘liq masalalarni ko‘rib chiqilmaydi, ular qonun hujjatlarda belgilangan tartibda hal etiladi.

Quyidagilar Komissiyaning asosiy vazifalari etib belgilanadi:

murojaatni va ro‘yxatga oluvchining ko‘chmas mulk obektiga bo‘lgan huquqni ro‘yxatga olish (rad etish) haqidagi qarorini o‘rganish;

murojaatlarni ko‘rib chiqishda komissiya a'zolari tomonidan tegishli ko‘chmas mulk obektini joyiga chiqqan holda o‘rganish ishlarini tashkil etish;

ko‘chmas mulk obektiga bo‘lgan huquqni yoki boshqa ashyoviy huquqni davlat ro‘yxatidan o‘tkazish (rad etish) uchun asos mavjudligini, uning jismoniy yoki yuridik shaxsga o‘tkazilishining qonuniyligini aniqlash;

huquqni belgilovchi hujjatlarning to‘g‘riligini o‘rganish;

ro‘yxatga oluvchining ko‘chmas mulk obektlariga bo‘lgan huquqlarni davlat ro‘yxatidan o‘tkazish jarayonidagi harakatlarining to‘g‘riligi haqida yoxud uning ko‘chmas mulk obektlariga bo‘lgan huquqlarni davlat ro‘yxatidan o‘tkazish (o‘tkazmaslik) haqidagi qarorini bekor qilish haqida xulosa berish; 

murojaat etuvchiga qabul qilingan qarori haqida javob yuborish.

Murojaat etuvchi Komissiyaga murojaatni yozma shaklda yoki elektron shaklda beradi. Murojaatga ko‘chmas mulk obektiga bo‘lgan huquqni belgilovchi hujjatlar hamda unda ko‘rsatilgan faktlarni tasdiqlovchi dalillar ilova qilinadi.

Murojaat etuvchi quyidagi hollarda murojaat qiladi:

ro‘yxatga oluvchining murojaat etuvchining ko‘chmas mulk obektlarini davlat ro‘yxatidan o‘tkazish jarayonida harakatlari yoki harakatsizligida, agar bunday harakatlar yoki harakatsizlik oqibatida murojaat etuvchining huquqlari va qonuniy manfaatlarini buzilganda;

ko‘chmas mulk obektlariga bo‘lgan huquqlarni davlat ro‘yxatidan o‘tkazishda qonun hujjatlar talablari buzilganda;

ko‘chmas mulk obektlariga bo‘lgan huquqlarni davlat ro‘yxatidan o‘tkazish muddatlari asossiz uzaytirilganda;

ko‘chmas mulk obektlariga bo‘lgan huquqlarning davlat reyestri ma'lumotlaridan norozi bo‘lganda;

qonun hujjatlarida belgilangan boshqa hollarda.

Murojaat etuvchining murojaatida quyidagilar ko‘rsatilgan bo‘lishi lozim:

a) yuridik shaxsning nomi, rahbari (vakili)ning lavozimi, familiyasi, ismi yoki jismoniy shaxsning yoxud ularning ishonchli vakillarining familiyasi, ismi, otasining ismi, ko‘chmas mulk obektining joylashgan joyi, pochta va elektron pochta manzili, aloqa uchun telefon raqamlari;

b) murojaat qilinayotgan harakatlar yoki harakatsizlik haqida boshqa dalillar;

v) murojaat etuvchining imzosi va sana.

Murojaatga uning haqiqiyligini tasdiqlovchi hujjatlar ilova qilinadi. Bunda murojaatda unga ilova qilinayotgan hujjatlar ro‘yxati keltirilgan bo‘lishi kerak.