Belgiya harbiy kontrrazvedkasi rahbari Rossiya foydasiga josuslik qilishda ayblanmoqda

Belgiya harbiy kontrrazvedkasi rahbari maxfiylik qoidalarini buzish va Rossiya foydasiga ishlashda gumonlanib ishdan vaqtincha chetlatildi. Bu haqda o‘z manbalariga tayanib De Morgen gazetasi xabar berdi.

Xabarda aytilishicha, mayor Klement Vandenborrening ADIV (axborot va xavfsizlik bosh xizmati)dagi ofisi yanvar oyi oxirida muhrlangan, uning o‘zi esa uy qamog‘iga joylashtirilgan.

Mayor maxfiy hujjatlarni oddiy qog‘oz maydalagichda yo‘q qilganlikda gumonlanmoqda. Uning Rossiya bilan ehtimoliy aloqalari tafsiloti oshkor qilinmayapti.  

Shu bilan birga De Morgen gazetasi manbalari Vandenborrega qarshi ish ADIV ichidagi hokimiyat uchun kurash oqibati bo‘lishi mumkin deb hisoblashmoqda. Xizmat ichida yoshi katta rahbarlarga nisbatan norozilik kuchaymoqda: mayor razvedkada qirq yilga yaqin ishlagan.