O‘zbekiston OTM kirish imtihonlarini xalqaro standartlarga moslash uchun xorijiy ekspertlarni taklif etadi

O‘zbekistonda oliy ta'lim muassasalariga kirish test jarayonlarining xalqaro standartlarga mos ravishda o‘tkazilishini ta'minlash maqsadida,  Xalqaro ilmiy metodik markaz tashkil etilishi rejalashtirilgan. Markaz test sinovlarini baholash jarayoniga xalqaro ekspertlar guruhini jalb etish kabi masalalarni amalga oshiradi, deb xabar bermoqda Kun.uz muxbiri. 

«Xalqaro ekspertlardan tuzilgan ishchi guruh test materiallarining sifati, to‘g‘ri tuzilganligini ham nazorat qilib borishi nazarda tutilmoqda», – deydi DTM rahbari Majid Karimov. 

Abituriyentlar va ularning ota-onalari tomonidan ortiqcha ovoragarchiliklar va xarajatlarni oldini olish maqsadida ularning yashab turgan manzilida Davlat xizmatlari markazlari orqali ro‘yxatga olish, abituriyent tomonidan tanlanayotgan ta'lim muassasasining joylashgan hududidan qat'i nazar, o‘zi yashab turgan hududda test sinovlarida ishtirok etishi taklif o‘rnida ilgari surilmoqda. 

DTM rahbariyatiga ko‘ra, Bu xizmat uchun 10-20 ming so‘m atrofida to‘lov bo‘lishi mumkin. Oliy ta'lim muassasasiga kirish davlat imtihonlari uchun hujjatlarni elektron yuklash imkoniyati esa hozircha yo‘q.

«Elektron hujjat topshirish imkonini beradigan Universities.uz hali ishga tushmagan va bu platforma taklif sifatida ko‘rib chiqilmoqda», – deb qo‘shimcha qiladi DTM rahbari. 

DTM direktor o‘rinbosari Qahramon Haqberdiyev bergan ma'lumotga ko‘ra, davlat  xizmatlari markazlari hujjatlar qabulining ishonchliligi, muhofazalanganligini kafolatlaydi.​

Video: Mover (tas-ix)

Video: Youtube