Normativ-huquqiy hujjatlar loyihalari muhokamasi portalida Vazirlar Mahkamasining “O‘zbekiston Respublikasi Iqtisodiyot va sanoat vazirligi tizimidagi tashkilotlar faoliyatini samarali tashkil etish chora-tadbirlari to‘g‘risida”gi qarori loyihasi joylashtirildi.
Hujjatda qayd etilishicha, O‘zbekiston Respublikasi Iqtisodiyot va sanoat vazirligining Ma'muriy binosidan foydalanish boshqarmasi xodimlarining cheklangan umumiy soni 70 birlikdan etib belgilangan va budjet tashkilotiga tenglashtirilgan.
O‘zbekiston Respublikasi Iqtisodiyot va sanoat vaziriga Boshqarmaning shtatlar jadvaliga belgilangan shtatlar soni doirasida o‘zgartirishlar kiritish huquqi beriladi.
Boshqarma faoliyatini moliyalashtirish har yili tasdiqlanadigan xarajatlar smetasi doirasida respublika budjeti mablag‘lari hamda vazirlikning budjetdan tashqari mablag‘lari hisobidan amalga oshiriladi.
O‘zbekiston Respublikasi Vazirlar Mahkamasi huzuridagi Oliy attestatsiya komissiyasi Vazirlik bilan birgalikda 2019 yil 1 apreldan boshlab Prognozlashtirish va makroiqtisodiy tadqiqotlar instituti huzurida “makroiqtisodiyot”, “mintaqaviy iqtisodiyot” va “sanoat iqtisodiyoti” ixtisosliklari bo‘yicha fan doktori (DSc) va falsafa doktori (PhD) ilmiy darajasini beruvchi ilmiy kengashni o‘rnatilgan tartibda tashkil qiladi.
Vazirlik:
O‘zbekiston Respublikasi Axborot va ommaviy kommunikatsiyalar agentligi bilan birgalikda Institut huzurida xo‘jalik faoliyati hisobidan moliyalashtiriladigan davlat unitar korxonasi tuzishni va Oliy attestatsiya komissiyasining doktorlik dissertatsiyalari asosiy ilmiy natijalarini chop etish tavsiya etilgan ilmiy nashrlar ro‘yxatiga kiritishni ko‘zda tutgan holda, “Iqtisodiyot: tahlillar va prognozlar” jurnalini tashkil etadi;
Institut bilan birgalikda o‘rnatilgan tartibda “Iqtisodiyot: tahlillar va prognozlar” jurnali nashriyoti” davlat unitar korxonasini davlat ro‘yxatidan o‘tkazadi hamda xodimlarining shtat birliklari va mehnatga haq to‘lash razryadlarini tasdiqlaydi.
O‘zbekiston Respublikasi Innovatsion rivojlanish vazirligi manfaatdor vazirlik va idoralar bilan birgalikda ishlab chiqiladigan va o‘rnatilgan tartibda tasdiqlanadigan maqsadli ilmiy-texnik dasturlarni shakllantirishda vazirlikning buyurtmasi asosida Institut tomonidan amalga oshiriladigan amaliy-ilmiy loyihalarni hisobga oladi.
