O‘zbekiston dunyodagi eng baxtli davlatlar reytingida nechanchi o‘rinni egalladi?

O‘zbekiston dunyodagi eng baxtli davlatlar reytingida 41-o‘rinni egalladi. Bu haqdi BMT buyurtmasi asosida tayyorlangan World Happiness Report 2019 (Dunyodagi baxt to‘g‘risida hisobot)da aytiladi.

BMTning barqaror rivojlanishni ta'minlash usullari bo‘yicha tarmog‘i dunyodagi eng baxtli davlatlar bo‘yicha hisobot va reytingni e'lon qildi.

Jami 156 mamlakat reytingga kiritildi. Iqtisodiyot, psixologiya, statistika va boshqa ilmiy yo‘nalishdagi soha mutaxassislari uni tuzishda ishtirok etishdi.

Ekspertlar baholash mezonlari sifatida olti omilni tanlab olishdi: aholi jon boshiga to‘g‘ri keladigan haqiqiy YaIM, sog‘lom hayot davomiyligi, yaqin atrofdagi biror kishiga suyanish imkoni, hayotiy qarorlarni qabul qilishda erkinlikning sub'yektiv darajasi, korrupsiyadan himoyalanganlik va saxiylik.

Hisobot ma'lumotlariga ko‘ra, O‘zbekiston 6,174 indeks bilan sobiq SSSR hududidagi eng baxtli mamlakat sifatida tan olindi. Ta'kidlab o‘tish joizki, o‘tgan yili O‘zbekiston ushbu reytingda 44-o‘rinni egallagan.

Reytingning yuqori o‘rinlaridan Finlyandiya (1-o‘rin), Daniya (2), Norvegiya (3), Islandiya (4) va Niderlandiya (5) joy oldi. AQSh reytingda 19-o‘rinni, Buyuk Britaniya esa 15-o‘rinni egalladi.