Tojikiston bosh vaziri og‘ir kasal ekani aytildi, mamlakat rasmiylari buni rad etmoqda

Tojikiston bosh vaziri kotibiyati Qohir Rasulzoda og‘ir kasal ekani va iste'foga chiqish ehtimoli borligi haqidagi ma'lumotni rad etib, uni «taxminlarga qurilgan va bekorchilik bilan o‘ylab topilgan», deb atadi.

Kotibiyat ma'lum qilishicha, «bosh vaziri Qohir Rasulzodaning ahvoli yaxshi, u davolanishga muhtoj emas va hamon xalq hamda Vatanga sadoqat bilan xizmat qilishda davom etyapti, mas'ul davlat lavozimidagi o‘z majburiyatlarini bajarmoqda», deya xabar qiladi «Axbor»sayti.

Avvalroq, «Axbor» manbalari Tojikiston bosh vaziri Qohir Rasulzoda salomatligi holati tufayli iste'foga chiqishga tayyorgarlik ko‘rayotgani va bor e'tiborni davolanishga qaratishi haqida xabar bergandi. 58 yoshli Rasulzoda, «Axbor» suhbatdoshlarining so‘zlariga ko‘ra, jigar kasalligiga yo‘liqqan va xorijda malakali davolanishga muhtoj.

Tojikiston bosh vaziri kotibiyatining rasmiy raddiyasi 22 mart kuni «Xovar» davlat axborot agentligi tomonidan e'lon qilingan.

Bosh vazir Qohir Rasulzodaning kotibiyati rasman ma'lum qilishicha, hukumat rahbarining salomatligi haqidagi ma'lumot taxminlarga asoslangan hamda haqiqatga to‘g‘ri kelmaydi.