Portugaliya terma jamoasi hujumchisi Krishtianu Ronaldu Yevro-2020 saralashi doirasidagi Serbiyaga qarshi o‘yinda (1:1) jarohat oldi.
34 yoshli hujumchi birinchi bo‘lim o‘rtalarida o‘ziga uzoqdan uzatilgan to‘pga yugurib borayotib, birdan tezligini pasaytirishga majbur bo‘ldi; so‘ng zaxira o‘rindig‘i tomonga murojaat qilib, o‘zini almashtirishlarini so‘radi. Ma'lum bo‘lishicha, u o‘ng oyog‘i sonidan shikastlangan.
Cristiano Ronaldo being subbed for muscular injury! pic.twitter.com/26MZ10cLem
— Tancredi Palmeri (@tancredipalmeri) March 25, 2019
«Xavotir olayotganim yo‘q, o‘z tanamni bilaman. Bir yoki ikki haftada safga qaytsam kerak», – degan Ronaldudan iqtibos keltirmoqda portugal matbuoti.
Lissabondagi bahsning 31-daqiqasidan boshlab Krishtianuning o‘rnida yarimhimoyachi Pitssi o‘yinni davom ettirdi. Bu vaqtda hisob mehmonlar foydasiga 0:1 bo‘lib turgandi. Bo‘lim oxirlarida Danilo Pereyra muvozanatni tikladi. Ikkinchi bo‘limda jamoalar boshqa gol urishmadi, natijada Portugaliya milliy jamoasi Yevro-2020 saralashini ketma-ket ikkita durang bilan boshladi. Fernandu Santush jamoasi ilk turda ham o‘z uyida Ukrainani mag‘lub eta olmagandi (0:0).
Ukraina va Serbiyaga qarshi bahslar Krishtianu Ronaldu uchun Portugaliya milliy jamoasi safidagi JCh-2018dan keyingi ilk o‘yinlar bo‘ldi.
Ma'lumot uchun, «Yuventus» A Seriyaning navbatdagi turlarini «Empoli», «Kalyari» va «Milan»ga qarshi o‘tkazadi. 10 aprel kuni turinliklar YeChLning 1/8 finalining «Ayaks»ga qarshi dastlabki o‘yinini Amsterdamda o‘tkazadi.
Eslatib o‘tamiz, avvalroq Argentina milliy jamoasi sardori Lionel Messi ham jarohat olib, terma lagerini tark etgandi.
