Chirchiqda yuz bergan yong‘in oqibatida to‘rt kishi halok bo‘ldi

2019 yilning 27 mart kuni soat 00:29da Toshkent viloyati IIB Yong‘in xavfsizligi boshqarmasining Kuch va vositalarini boshqarish va muvofiqlashtirish markaziga Chirchiq shahri «Bobur» MFY Mashar ko‘chasidagi 17-uyda yong‘in sodir bo‘layotganligi haqida xabar kelib tushgan.

O‘zbekiston Respublikasi IIV YoXBB OAV bilan hamkorlik qilish bo‘linmasi xabariga ko‘ra, voqea joyiga zudlikda 6 ta yong‘in o‘chirish ekipajlari jalb etilgan. Yong‘in o‘chirish bo‘linmalari soat 00:39da ko‘rsatilgan manzilga yetib borgan vaqtida uy ochiq alanga bilan yonayotganligi ma'lum bo‘lgan. 

Ko‘rilgan tezkor harakatlar natijasida yong‘in soat 01:20da qurshab olinib, soat 01:58da bartaraf etilgan. Yong‘in oqibatida 200 kv metr maydonda 17-uyning tomi, shifti va ichki jihozlari yonib zararlangan (uyning 100 kv metr maydoni saqlab qolingan).

Yong‘in jarayonida shu uyda yashagan 8 nafar oila a'zosidan 4 nafari ya'ni, 33 yoshlik fuqaro B.R, uning rafiqasi hamda ikki nafar 8 va 12 yoshdagi farzandlari vafot etgan. 

Yong‘in holati yuzasidan tergovga qadar tekshiruv olib borilmoqda. Yong‘in sababi va moddiy zarar miqdori aniqlanmoqda.