O‘zbekistonda viloyatlararo yo‘llardagi beton to‘siqlar balandligini oshirish taklif qilindi

“Mening fikrim” jamoaviy murojaatlar portalida viloyatlararo yo‘llardagi beton to‘siqlarning balandligini oshirish haqida petitsiya e'lon qilingan. 

“Bugun yurtimiz yo‘llari kundan-kunga yaxshilanib, yangilanib, ularning xavfsizligiga katta e'tibor berilyapti. Bu juda yaxshi. Lekin hali sohada qilinishi kerak bo‘lgan ishlar ham talaygina”, - deyiladi murojaatda. 

Bildirilishicha, kechki vaqtda viloyatlararo yo‘llarda beton to‘siqlarning pastligi sababli qarama-qarshi tomondan kelayotgan transport vositasining chiroqlari ko‘zni qamashtirib, turli avtohalokatlarga sabab bo‘lmoqda.

“Taklifim, viloyatlararo yo‘llarni ikkiga ajratish uchun qo‘yilgan beton to‘siqlar balandligini mutaxassislar bilan o‘rganib chiqib, qo‘shimcha 40-50 sm.ga ko‘tarish, bunday betonlarning standartlariga o‘zgartirish kiritish lozim”, - deb yozadi petitsiya muallifi. 

Qayd etilishicha, shunda yo‘llarda turli baxsiz hodisalar soni yanada kamayadi.

Bundan oldin, “Chilonzor” metro bekati ustida yer usti yo‘l o‘tkazgichini qurish taklif etilgandi.