Bojxonachilarning «pogoni»ni yulib olgan shaxsga sud hukmi o‘qildi

11-17 aprel kunlari jinoyat ishlari bo‘yicha Toshkent viloyati O‘rtachirchiq tuman sudi sudyasi X.Xotamov raisligida Nurafshon shahridagi 12-bolalar va san'at musiqa maktabida ochiq sayyor sud majlisi o‘tkazildi.

Sud sudlanuvchi N.A.ga nisbatan jinoyat kodeksining 219-moddasi 2-qismi («Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish») doirasidagi ishni ko‘rib chiqdi.

Ma'lum bo‘lishicha, N.A. 2018 yilning 21 sentyabrga o‘tar kechasi tungi soat 04:00lar atrofida «G‘ishtko‘prik» chegara bojxona postining Qozog‘iston Respublikasidan O‘zbekiston Respublikasiga kirish zalida tekshiruvdan o‘tkazilgan. U post inspektorlari tomonidan Vazirlar Mahkamasining me'yordan ortiqcha tovar - moddiy boyliklar olib o‘tmaslik holatlari tekshirilayotganda ularga qattiq qarshilik qilgan.

U bojxona talablariga bo‘ysunmay, inspektor N.Rasulovani haqorat qilgan, tinchlantirmoqchi bo‘lgan inspektor A.Rajabovning xizmat kiyimidagi maxsus unvonining (pogoni) bir tomonini yulib olgan. U shuningdek, axloqqa zid harakatlarini videotasvirga tushirayotgan inspektor S.Abdullayevaning qo‘liga yengil jarohatlar yetkazgan.

Sud taraflar fikrlari va dalillarini o‘rganib chiqdi. Fuqaro A.N. Jinoyat kodeksining 219-moddasining 2-qismi bilan aybli deb topildi. Unga ish haqining 20 foizini davlat daromadi hisobiga ushlab qolgan holda, 2 yil muddatga axloq tuzatish ishlari jazosi tayinlandi.

Shuningdek, O‘rtachirchiq tuman IIB tomonidan kiritilgan mahkumlar B.Bo‘riyev, O.Madraximov, K.Pisenov, J.Pulatov, F.Radjapov, M.Raximov, S.Usmanov va A.Xabibullayevga tayinlangan axloq tuzatish ishlari jazosini o‘talmay qolgan qismini o‘tashning muddatidan ilgari shartli ravishda ozod etish to‘g‘risidagi taqdimnomasi qanoatlantirildi.