Hotamjon Ketmonov ham partiya raisligidan ketdi. Uning o‘rnini prezident tanqidiga uchragan sobiq vazir egalladi

Xalq demokratik partiyasi Markaziy Kengashi raisi Xotamjon Abdurahmonovich Ketmonov o‘z lavozimini tark etdi.

Kun.uz manbasi xabar berishicha, 1 iyun  kuni O‘zbekiston XDPning navbatdan tashqari plenumi bo‘lib o‘tdi va unda partiyaning yangi rahbari saylandi.

Endilikda partiyaga Namangan davlat universiteti rektori sifatida ishlab kelgan Ulug‘bek Inoyatov raislik qiladi.

Ma'lumot uchun, Hotamjon Ketmonov 2013 yildan buyon XDP Markaziy kengashi raisi sifatida ishlab kelayotgandi. U 2015 yildan hozirgi vaqtga qadar O‘zbekiston Respublikasi Oliy Majlisi Qonunchilik palatasi Spikerining o‘rinbosari, O‘zbekiston XDP fraksiyasi rahbari edi.

Hotamjon Ketmonov 2015 va 2016 yilgi prezidentlik saylovlarida XDP partiyasidan nomzod sifatida qatnashgandi.

Ulug‘bek Inoyatov 2013 yil fevralidan 2018 yil 20 iyuniga qadar Xalq ta'limi vaziri bo‘lgan. Vazir bo‘lishdan avval 2011-2013 yillarda Toshkent davlat pedagogika universitetiga rektorlik qilgan.

Prezident Shavkat Mirziyoyev 2018 yilning birinchi yarim yilligi yakunlari bo‘yicha investitsiya loyihalarini amalga oshirish holatiga bag‘ishlangan videoselektorda Xalq ta'limi vazirligida boshlangan islohot haqida gapirib, Ulug‘bek Inoyatovni jiddiy tanqid qilgandi.

«Ko‘p rahbarlarni almashtiryapmiz. Kecha shuncha tajribasi bor Inoyatovni ishdan olib tashladim. O‘rniga Shermatovni qo‘ydim. Tarixda bunaqasi bo‘lmagandi. Butun jamoasi bilan almashtirdim. Bo‘lim boshliqlariniyam ishdan olishga ko‘rsatma berdim. Chunki u eski odam. Bir yarim yil ishlab, birorta taklif bermadi.

Tizimda korrupsiya, maktablarda korrupsiya bo‘lib ketgan. Toshkent shahridagi ahvolga maymunlar yig‘laydi. Eski jamoadan bitta yoshlar bo‘yicha muovin qoldi. Vazirlikning hududiy ta'lim boshqarmalari, tumanlardagi boshqarmalar rahbarlarini ishdan olishga topshiriq berdim», degandi prezident.

Eslatib o‘tamiz, 22 may kuni prezidentlikka sobiq nomzod Sarvar Otamurodov O‘zbekiston «Milliy tiklanish» demokratik partiyasi markaziy kengashi raisi lavozimini tark etgan, uning o‘rnini Respublika Ma'naviyat va ma'rifat markazi rahbari Alisher Qodirov egallagandi.