Farg‘ona vodiysida shaharlararo muntazam avtobus qatnovlari yo‘lga qo‘yildi. Yo‘lkira narxi ham ma'lum

Kecha, 6 sentabr kuni Farg‘ona shahridagi avtoshohbekatda Transport vazirligi tomonidan “Farg‘ona-Andijon”, “Farg‘ona-Namangan” va “Farg‘ona-Beshariq” shaharlararo yo‘nalishlarida muntazam avtobus qatnovlarining yo‘lga qo‘yilishi munosabati bilan tantanali tadbir bo‘lib o‘tdi. 

Qayd etilishicha, mazkur yo‘nalishlarda aholiga sifatli xizmat ko‘rsatish maqsadida Uzautotrans service korxonasining 14 ta Yutong rusumli zamonaviy avtobuslari ajratildi. 

Vazirlik ma'lumotida Farg‘ona vodiysida shaharlararo yo‘nalishlarida tashkil etilgan muntazam avtobus qatnovlari yo‘lkira narxi ham ochiqlangan. 

Jumladan, masofasi 65 km teng bo‘lgan “Farg‘ona-Andijon” avtobus yo‘nalishida chipta narxi 11 000 so‘m, “Farg‘ona-Namangan” yo‘nalishida 14 000 so‘m, “Farg‘ona-Beshariq” yo‘nalishida esa 18 000 so‘m etib belgilandi.