«Manchester Siti» Angliya chempionatining 5-turida sensatsion ravishda «Norvich»ga yutqazdi (2:3).
«Manchester Siti» Angliya chempionatining 5-turida sensatsion ravishda «Norvich»ga yutqazdi (2:3). «Liverpul» esa xotirjamlik bilan «Nyukasl»ni mag‘lub etdi va turnir jadvalida «shaharliklar» bilan oradagi farqni 5taga yetkazdi.
Kunning birinchi o‘yinida bir necha e'tiborga molik voqealar ro‘y berdi.
Ularning birinchisi - og‘ir jarohatini davolagan Aleks Oksleyd-Chemberlen 508 kunlik tanaffusdan keyin «Enfild»da boshlang‘ich tarkibda maydonga tushdi.
«Nyukasl» optimal tarkibda bo‘lmasada, mezbonlarni hayron qoldirgan holda 7-daqiqadayoq Yyetro Villemsning qoyilmaqom goli bilan hisobni ochishdi. Gollandiyalik futbolchi premer-ligadagi ilk aniq zarbasini golga aylantirdi.
«Liverpul» birinchi bo‘limda yuqori tezlikda harakat qilmadi, ammo qiyinchiliksiz hisobda oldinga chiqib olishga erishdi. Ikki gol ham Mane hisobiga yozildi.
O‘yinning ikkinchi qismida esa mersisaydliklar raqibga imkon qoldirishmadi. Katta ustunlik bilan harakat qilgan Klopp shogirdlari yirik hisobdagi g‘alabaga erishishlari ham mumkin edi, ammo o‘yinning qolgan qismida faqat bir gol urildi, Firminoning fenomenal harakatlarini Saloh yakuniga yetkazib qo‘ydi. Braziliyalik futbolchi misrlik futbolchini dohiyona pas bilan oldinga chiqardi, hujumchi raqib jarima maydoniga kirib borib, darvozabonni dog‘da qoldirdi.
Shu tariqa, «Liverpul» qatorasiga 14-g‘alabani nishonladi, bu o‘yinlarda kamida ikkitadan gol urdi va bu APLning yangi rekordidir.
Frenk Lempardning yangilangan, yoshlar bilan to‘ldirilgan jamoasi «Vulverhempton»ga yaqqol favorit sifatida tashrif buyurmagandi. «Ko‘klar» jamoasi bungacha 4 tur davomida jami 9 gol o‘tkazib yuborgani jamoa himoyasida muammolar yetarli ekanini ko‘rsatardi.
Lekin «bo‘rilar» ham o‘tgan mavsumdagidan farqli ravishda bu mavsumni yomon boshlashdi — uch durang va bir mag‘lubiyat. Shunday ekan, jamoa o‘z muxlislari ishonchini qaytarish uchun nomdor raqibga qarshi g‘alabaga erishishi talab etilardi. Nunu Eshpiritu-Santu jamoasi o‘yinni hujumkor boshladi, «Chelsi» ilk 10-15 daqiqalikda gollar o‘tkazib yuborishdan bazo‘r qutulib qoldi, ammo jamoa himoyasi matonat ko‘rsatdi va hujumchilar bo‘limning ikkinchi qismini haqiqiy shouga aylantirishdi. Londonliklar bo‘limning so‘nggi 15 daqiqaligida 3ta gol urishdi. Bu esa unikal natija hisoblanadi (ikkinchi bo‘limda bu natija yanada yaxshilandi): jamoaning so‘nggi 9ta goli 21 yoshdan kichik futbolchilar tomonidan urilmoqda (Abraham - 5, Maunt - 3, Tomori - 1).
O‘yinda hisob markaziy himoyachi Tomori tomonidan ochildi, u uzoq masofadan raqib darvozasini ishg‘ol etib, shedevr gol muallifiga aylandi. Keyin tanaffusgacha Abraham ikki gol urdi va Ronaldu va Allining natijalarini takrorladi - ularning hammasi 21 yoshga chiqmasdan APLda qatorasiga uch o‘yinda gol urishgan. Ikkinchi bo‘limda Abraham uchinchi golini urdi.
Bu mavsumdagi gollari sonini 7taga yetkazib olgan Temmi Abraham «bo‘rilar»ga qarshi o‘yinda het-trik qilishdan tashqari, o‘z jamoasi darvozasini ham ishg‘ol qilib qo‘ydi. Bu bilan u APL tarixidagi het-trik+avtogolga mualliflik qilgan birinchi futbolchi bo‘ldi.
«Vuxverhempton» javob gollari urish uchun ko‘p kuch sarfladi, ammo jamoaning kuchi faqat ikki gol urishga yetdi. «Chelsi» esa so‘nggi daqiqalarda beshinchi golni ham urdi. Lempardning yosh jamoasida ilk ishonchli g‘alaba.
«MYu» hozircha mavsum startini ishonchsiz o‘tkazmoqda, muxlislar esa har o‘yinda Ole Gunnar Sulsherga ishonchlarini kamaytirishmoqda. «Old Trafford»dagi so‘nggi 5 o‘yinda «Yunayted» 3 marta mag‘lub bo‘ldi. Holbuki bungacha, jamoa o‘z maydonidagi 52 uchrashuvda 3 marta mag‘lubiyatga uchragandi.
Ayrim ingliz ekspertlari to‘g‘ridan-to‘g‘ri efirda agar bu o‘yinda «MYu» g‘alaba qozonsa hayron qolishlarini ayta boshlashdi. Navbatdagi o‘yinda ham «qizil iblislar» durang natija qayd etishi mumkin edi — jamoa raqib darvozasi oldida xavfli vaziyatlar yarata olishmadi, ammo jamoaga 11-metrli jarima zarbasi yordam berdi. O‘yinning 8-daqiqasida Reshfordga jarima maydonida qo‘pollik qilishdi va uning o‘zi penaltini aniq ijro etdi. Kichik g‘alaba va muxlislar inqirozga ko‘z yumib turishadi.
Bu mavsumda ham chempionlik kurash «Manchester Siti» va «Liverpul» o‘rtasida kechishi aniqqa o‘xshab qoldi. Bu esa Xosep Gvardola jamoasi raqibni ancha oldinga o‘tkazib yubormaslik uchun «Norvich»ni yengishi kerak degani edi. Hamm 8 nafar futbolchisi jarohat tufayli maydonga tusha olmayotgan «Norvich» bu oqshom ko‘p bilan amaldagi chempionlarga qarshi munosib o‘ynashga harakat qilishini kutgandi.
Mezbonlar esa birinchi bo‘limning o‘zida «Siti» darvozasini ikki bor ishg‘ol etishdi.
Ikki gol! Bu gollar ham oddiy vaziyatlarda urildi. Birinchisi — burchak zarbasi amalga oshirilganda to‘p bosh bilan yaqin burchakka yo‘naltirilishi orqali, ikkinchisi — ideal darajadagi qarshi hujum natijasida.
«Siti» APLda ikki to‘p farqi bilan ortda qolishi 2016 yildan buyon kuzatilmagandi, o‘shanda bunday ustunlikka «Lester» jamoasi erishgandi. Ammo chempion jamoani osonlik bilan shok holatiga tushirib bo‘lmaydi. Bo‘lim oxirida mehmonlar Agueroning sa'y-harakatlari bilan hisobni qisqartirishga erishishdi. Argentinalik futbolchi o‘zining golli seriyasini davom ettirmoqda — u APLning qatorasiga beshinchi o‘yinida gol urdi.
Ammo ikkinchi bo‘limda ham «Siti»ning dahshatli tushi davom etdi. O‘z jamoasi jarima hududida to‘pni sherigidan qabul qilib olgan Otamendining xayoli qochdi va Buendia undan to‘pni osonlik bilan olib qo‘yib, Pukkini darvoza qarshisida darvozabon bilan yakkama-yakka qoldirdi, to‘purar hujumchi esa «Norvich»ning uchinchi golini urdi. Finlyandiyalik futbolchi mavsum startida Aguerodan qolishayotgani yo‘q: 5 o‘yinda 6 gol va 2 golli uzatma.
Gvardiola hujumni kuchaytirish uchun maydonga Jyezus va De Breyneni tashladi. Ammo omad autsayder, shu bilan birga jangovar o‘yin ko‘rsatgan jamoa tomonida bo‘ldi. APL debyutanti «Norvich» sensatsiya qayd etdi. «Siti» endi «Liverpul»dan 5 ochko ortda qolmoqda. «Shaharliklar»ning 18 uchrashuvdan iborat g‘alabasiz seriyasi (17 g‘alaba va bir durang) shu yerda to‘xtatildi.
«Tabriklayman, «Liverpul». Sen chempionsan… Hali sentyabrmi, nima bo‘pti? Biz o‘z xatolarimizni ko‘rib chiqamiz, yanada ko‘proq ishlaymiz va yana maydonga qaytamiz.
Biz besh ochko yo‘qotdik. «Tottenhem» bilan o‘yinda (2:2) biz haddan tashqari zo‘r o‘ynagandik. Endi bundan buyog‘iga nima qilishimiz kerakligini o‘ylab olishimiz kerak», – dedi o‘yindan keyingi matbuot anjumanida Gvardiola.
