Toshkent viloyatining uchta tumanida yer maydonlari yangi loyihalarni amalga oshirish uchun ajratiladi

Vazirlar Mahkamasining “Toshkent viloyatining Parkent, Bo‘stonliq va Ohangaron tumanlarida g‘alla ekishdan qisqartiriladigan yer maydonlarida mevachilik va uzumchilik, sabzavotchilik, kartoshkachilik yo‘nalishidagi loyihalarni amalga oshirish chora-tadbirlari to‘g‘risida”gi qarori loyihasi e'lon qilindi.

O‘zbekiston Respublikasi Qishloq xo‘jaligi vazirligi, “Davergeodezkadastr” qo‘mitasi va Toshkent viloyati hokimligining g‘alladan qisqartiriladigan yer maydonlarini tajriba-sinov tariqasida meva-uzumchilik, sabzavot-kartoshkachilik bilan shug‘ullanish maqsadida ochiq tender tanlovlari orqali uzoq muddatli ijaraga berish haqidagi taklifi ma'qullanishi mumkin.

Toshkent viloyati Parkent, Bo‘stonliq va Ohangaron tumanlarida g‘alla ekishdan qisqartiriladigan yer maydonlarini tajriba-sinov tariqasida tanlov asosida meva-uzumchilik, sabzavot-kartoshkachilik yo‘nalishidagi yirik loyihalarga ajratish tartibi to‘g‘risidagi nizom tasdiqlanadi.

Belgilanishicha:

tender tanlovi va shartlarida yerning joylashgan manzili, maydoni va chegaralari (konturlar kesimida), yer fondidagi toifasi, holati, ball boniteti, suv tarmog‘i, ekilishi lozim bo‘lgan ekin turi va boshqa muhim parametrlari tasdiqlanadi va ommaviy axborot vositalari orqali e'lon qilinadi;

Akademik M.Mirzayev nomidagi bog‘dorchilik, uzumchilik ilmiy-tadqiqot instituti, Sabzavot, poliz ekinlari va kartoshkachilik ilmiy-tadqiqot instituti bilan hamkorlikda g‘alladan qisqartiriladigan yer maydonlarini har bir hududlarining tuproq-iqlim sharoitidan kelib chiqib ixtisoslashtirish, ushbu yerlarga intensiv bog‘lar va tokzorlar barpo etish, sabzavot, poliz va kartoshka ekinlarini joylashtirish bo‘yicha tavsiyalarini ishlab chiqadi hamda ular tender tanloviga taqdim etiladi.

Meva-uzumchilik, sabzavot-kartoshkachilik sohasidagi loyihalarni tanlovi quyidagi tamoyillarga asosan tashkil etiladi:

axborotning ochiqligi va erkinligi;

tashabbuskorlarning teng huquqliligi;

tashabbuskorlar tomonidan majburiyatlarni bajarilishi.

Loyihalar tanlovini amalga oshirish uchun tashabbuskorlarni jalb qilish quyidagi maqsadlar uchun amalga oshiriladi:

xalqaro standartlar bo‘yicha, shuningdek, hududlarning tuproq iqlim sharoitlaridan kelib chiqib, innovatsion texnologiyalarini qo‘llagan holda meva, uzum, sabzavot va kartoshka yetishtirish, yig‘ib-terib olish va realizatsiya qilish, shuningdek, eksport qilish;

meva-uzumchilik, sabzavot-kartoshkachilik sohasidagi tanlovida yuqori hosildorlikka, sifatga ega, zararli organizm va kasalliklarga chidamli, yuqori qo‘shilgan qiymatga ega raqobatbardosh mahsulotlar yetishtirish tizimini yaratish;

tashabbuskorning o‘z mablag‘i va to‘g‘ridan-to‘g‘ri xorijiy investitsiyalarni, shuningdek, tijorat banklari kreditlarini jalb etish hisobiga meva, uzum, sabzavot va kartoshka yetishtirish va chuqur qayta ishlashni yo‘lga qo‘yish.

Tuman yer resurslari va davlat kadastri bo‘limi tuman Qishloq xo‘jaligi bo‘limi bilan birgalikda g‘alladan qisqartiriladigan bo‘sh turgan yoki zaxiraga olingan yerlarning ro‘yxatini shakllantiradi, dastlabki loyiha yo‘nalishini, qishloq xo‘jaligi massivlarining (hududlar) ixtisoslashuviga e'tibor bergan holda belgilab, tasdiqlash uchun tuman hokimiga taqdim qiladi.

Har bir yer uchastkasi bo‘yicha ro‘yxatga quyidagilar ilova qilinadi:

yer uchastkasining maydoni (gektarda), yer uchastkasining yer fondidagi yer toifasi va yer turlari kesimida ma'lumot, ball boniteti, suv bilan ta'minlanish darajasi, infratuzilma obektlari haqida qisqacha ma'lumot;

yer uchastkasining (M 1:10 000 miqyosdagi) qishloq xo‘jaligi xaritasidan ko‘chirmasi, yer uchastkasining chegaralari va manzillarini ko‘rsatilgan holda joylashish rejasi.

Tuman hokimi ma'lumotlarni ko‘rib chiqadi va loyiha yo‘nalishini tasdiqlab, loyiha tuzish uchun bir ish kun muddatda tanlov tashkilotchisiga yuboradi.

Tanlov tashkilotchisi:

tuman hokimligi tomonidan taqdim etilgan loyihalar yo‘nalishlari bo‘yicha ommaviy axborot vositalarida tanlov o‘tkazish yuzasidan e'lon beradi;

ishtirokchilardan tanlov takliflarini qabul qiladi, ularning hisobini yuritadi, tanlov komissiyasi tomonidan belgilangan tartibda xatjild ochilgunga qadar butligini, maxfiyligini ta'minlaydi.

Quyidagilar uchun Komissiyaning xulosasi asosida tuman hokimining qaroriga asosan tanlov o‘tkazilmasdan yer maydonlari ajratiladi:

sabzavotchilik, kartoshkachilik, bog‘dorchilik-uzumchilik loyihalariga qo‘shimcha 10 ming AQSh dollari ekvivalenti miqdorida to‘g‘ridan-to‘g‘ri investitsiya kiritadigan talabgorlarga va klaster korxonalariga mablag‘lar bankdagi hisobvarag‘ida ko‘ringanidan so‘ng, joriy yilda maqsadli ishlatish sharti bilan eng kam o‘lchamlari 100 gektardan kam bo‘lmagan hajmda investitsiya majburiyatlari asosida.

Bunda, mazkur talablar asosida yer uchastkasi ajratilgan yoki yangidan tashkil etilgan qishloq xo‘jaligi korxonalari biznes rejasida ko‘rsatilgan majburiyatlarini bajarmagan taqdirda, yer ijara shartnomasi tuman hokimi tomonidan bir tomonlama bekor qilinishi uchun asos hisoblanadi.