Unda ma'lum qilinishicha, mamlakatdagi 455ta ko‘p qavatli uy avariya holatida. Bu uylarning 80 foizi texnik ko‘rikdan o‘tkazilgan, qolganlarining texnik holatini aniqlash ishlari ham yil oxirigacha yakunlanadi.
«Ko‘rik natijalariga qaraganda, [avariya holatidagi ko‘p kvartirali] uylarning aksariyati seysmik bardoshliligi, energiya samaradorligi bo‘yicha talab darajasida emas. Texnik ko‘rik to‘liq yakunlangach, seysmik nosoz uylar buziladi, buzilmaydiganlari esa energiya auditidan o‘tkaziladi», ─ dedi Qurilish vaziri o‘rinbosari Shuhratxo‘ja Hoshimov.
Hoshimovga ko‘ra, eskirib qolgan uylar o‘rniga yangilarini qurishni nazarda tutuvchi renovatsiya dasturi nafaqat aholi uchun qulay turar joy qurish, balki kerakli o‘rinlarda ijtimoiy infratuzilma bunyod etilishini ham maqsad qilishi lozim.
«Hudud bosh rejasini tuzishda faqatgina turar joylarning qurilishiga emas, balki ijtimoiy infratuzilma, maishiy xizmat ko‘rsatish shoxobchalarining ham muvofiq tarzda bunyod etilishini nazarda tutish kerak.
Renovatsiya – osonlik bilan kechadigan jarayon emas. Rivojlangan Xitoyda ham bu jarayon 70 yildan beri davom etadi.
Renovatsiya hamda ijtimoiy infratuzilma bunyodkorligi to‘g‘ri uyg‘unlashtirilsa, hududning iqtisodiy jozibadorligini oshirishga erishish mumkin», ─ dedi vazir o‘rinbosari.
Bundan oldin, O‘zbekistondagi ko‘p qavatli uylarning yarmidan ko‘pi ta'mirtalab ahvoldaligi ma'lum qilingan edi.
