70 yoshli Uorren Berni Sanders bilan birga partiyaning so‘l qanoti g‘oyalarini ifodalar edi.
U prezidentlik poygasi yetakchilaridan biri sanalayotgandi, ammo demokratlarning fevral va mart oylaridagi praymerizlarida u birorta shtatda ham g‘alaba qozona olmadi.
«Tobutdan qaytish»: «Superseshanba»da Bayden birinchi o‘ringa chiqib qoldi
AQShning 14ta shtatida va Amerika Samoasida birlamchi saylovlar o‘tkazilgan «superseshanba»da Uorrenni qo‘llovchilar Jo Bayden va Berni Sanders tarafdorlaridan sezilarli darajada kamligi ko‘rinib qoldi.
Endilikda demokratlardan yana bir nomzod Havayi shtatidan kongressvumen bo‘lgan, Iroqdagi urush faxriysi Tulsi Gabbard ham poygada qolmoqda, lekin uning natijalari Uorrennikidan ham yomonroq va u ham tez orada poygani tark etganini e'lon qilishi kutilmoqda.
Respublikachilar partiyasidan esa amaldagi prezident Donald Tramp qayta saylanish uchun harakat qiladi.
AQShda prezidentlik poygasi. Bu haqda nimalarni bilish lozim?
Tengsizlikka qarshi kurashgan nomzod
So‘l liberallar doirasi Uorren nomzodiga katta umidlar bog‘lashgandi. Xususan, New York Times nashridagi sharhlar bo‘limi aynan uning nomzodini qo‘llab-quvvatlayotgandi.
Publitsistlar u poyga favoriti bo‘lishiga ishonch bildirishgandi. Ammo so‘rovlar ko‘rsatdiki, Uorren faqat oliy ma'lumotli amerikaliklar orasidagina mashhur bo‘la oldi. Lekin bu toifa saylovchilarning kamchilik qismini tashkil etadi, lekin ular ijtimoiy tarmoqlarda faollik ko‘rsatishdi.
«Bugun tongda men o‘z prezidentlik kampaniyamni to‘xtatayotganim haqida e'lon qildim. Men bu haqda aytar ekanman, bu kurashda qatnashgan barchaga, yangi g‘oyalarni sinab ko‘rish istagini bildirganlarga, Qo‘shma Shtatlar prezidenti aslida qanday bo‘lishi kerakligi haqidagi tasavvurlarini namoyon etgan barchaga chuqur minnatdorchiligimni bildiraman», degan Uorren xonim.
