Vazirlar Mahkamasining muhokama uchun e'lon qilingan qarori loyihasiga ko‘ra, davlat ishtirokidagi korxonalarda ijroiya organi faoliyati samaradorligining muhim ko‘rsatkichlarini (KPI - Key Performance Indicators) joriy etish va uning monitoringini yuritish tartibi to‘g‘risidagi nizom tasdiqlanadi.
Davlat aktivlarini boshqarish agentligi davlat va xo‘jalik boshqaruvi organlari bilan birgalikda ustav kapitalida (fondida) davlat ulushi 50 foiz va undan ortiq bo‘lgan korxonalarda, shuningdek, ularga ustav kapitalining (fondining) 50 foizi va undan ortig‘i tegishli bo‘lgan korxonalarning tegishli boshqaruv organlari yig‘ilishlarida ijroiya organi faoliyati samaradorligining muhim ko‘rsatkichlarini joriy etish masalasi ko‘rib chiqilishini ta'minlaydi hamda uning bajarilishi yuzasidan tizimli monitoringni amalga oshiradi.
Belgilanishicha:
davlat ishtirokidagi korxonalarda keyingi yil uchun biznes-reja va unga ilova sifatida samaradorlikning muhim ko‘rsatkichlari vakolatli boshqaruv organi tomonidan har yili 1 dekabrgacha tasdiqlanadi hamda har chorak yakuni bo‘yicha uning bajarilishi to‘g‘risida ijroiya organining hisoboti eshitib boriladi;
davlat ishtirokidagi korxonalarda ijroiya organi rahbarlari va a'zolarini rag‘batlantirish ularning faoliyati samaradorligi muhim ko‘rsatkichlari bajarilishiga to‘g‘ridan-to‘g‘ri bog‘liq bo‘ladi;
davlat ishtirokidagi korxonalarda ijroiya organi faoliyati samaradorligi natijalari Agentlik rasmiy veb-saytida joylashtirilmaganda yoki ularning faoliyati qoniqarsiz yoxud past darajada deb e'tirof etilgan taqdirda rag‘batlantirishga yo‘l qo‘yilmaydi;
davlat ishtirokidagi korxonalar, shu jumladan tijorat banklari ijroiya organining yil yakunlari bo‘yicha faoliyat samaradorligi yuqori baholangan taqdirda ularga olingan sof foydaning 5 foizigacha miqdorida o‘rnatilgan tartibda bir yo‘la to‘lanadigan bonus berilishi mumkin.
Bunda, to‘langan bonus miqdori to‘g‘risidagi axborot, to‘lov amalga oshirilgan sanadan ikki kunlik muddatda davlat ishtirokidagi korxonalar veb-saytiga joylashtiriladi.
Moliya vazirligi maxsus texnik topshiriq asosida yetakchi xalqaro konsalting kompaniyalarini jalb qilgan holda davlat ishtirokidagi tijorat banklari boshqaruv organlari samaradorligining muhim ko‘rsatkichlari (KPI) ishlab chiqilishini ta'minlaydi.
