Milliy gvardiya qo‘mondoniga yangi o‘rinbosarlar tayinlandi

IIV Patrul-post xizmati va jamoat tartibini saqlash bosh boshqarmasi boshlig‘i polkovnik Bekmurod Abdullayev Milliy gvardiya qo‘mondonining jamoat xavfsizligini ta'minlash bo‘yicha birinchi o‘rinbosari bo‘ldi. Shuningdek, Mamirjon G‘aniyev va Sarvar Mamayusupov qo‘mondon o‘rinbosarlari etib tayinlangan.

Foto: KUN.UZ

O‘zbekiston Respublikasi Milliy gvardiyasida yangi lavozim tayinlovlari amalga oshirildi.

Milliy gvardiya matbuot xizmati xabar berishicha, polkovnik Bekmurod Tojimirzayevich Abdullayev Milliy gvardiya qo‘mondonining jamoat xavfsizligini ta'minlash bo‘yicha birinchi o‘rinbosari lavozimiga tayinlandi.

Bekmurod Abdullayev 2019 yil noyabrida polkovnik Baxtiyor Pormonov o‘rniga Ichki ishlar vazirligining Patrul post xizmati va jamoat tartibini saqlash Bosh boshqarmasi boshlig‘i lavozimiga tayinlangandi.

Shuningdek, polkovnik Mamirjon Jamoliddinovich G‘aniyev Milliy gvardiya qo‘mondonining o‘rinbosari – Qo‘riqlash bosh boshqarmasi boshlig‘i lavozimini egalladi. Mamirjon G‘aniyev shu vaqtgacha O‘zbekiston Respublikasi prezidenti qoshidagi Xavfsizlik kengashi apparatida sektor mudiri lavozimida ishlab kelayotgandi.

Polkovnik Sarvar Dehqonboyevich Mamayusupov Milliy gvardiya qo‘mondonining tarbiyaviy va mafkuraviy ishlar bo‘yicha o‘rinbosari lavozimida ish boshladi. U muqaddam Mudofaa vazirligi tizimida ishlagan.

Eslatib o‘tamiz, joriy yilning 16 mart kuni general-mayor Rustam Jo‘rayev Milliy gvardiya qo‘mondoni lavozimini egalladi.