Boris Jonson Hongkongning 3 mln fuqarosiga Britaniyada yashash huquqini berishga tayyorligini aytdi

Rasmiy Londonning bu qadami xavfsizlikka doir yangi qonun qabul qilish orqali Hongkong ustidan nazoratni kuchaytirishga urinayotgan Xitoyga xalqaro bosimni kuchaytiradi.

Pekindagilar Boris Jonsonning bu qadami «javobsiz qolmasligi»dan ogohlantirdi.

«Hongkongda yashayotgan ko‘plab odamlar Xitoy qo‘llab-quvvatlashni va'da qilgan hayotlari xavf ostida qolishidan qo‘rqishmoqda, — deb yozgan Jonson The Times of London gazetasidagi kolonkasida. — Agar Xitoy hongkongliklarning bu qo‘rquvini reallikka yaqinlashtirishda davom etsa, u holda Britaniya qo‘l qovushtirib tura olmaydi; aksincha, biz o‘z majburiyatilarimizni bajaramiz va alternativ variant taklif qilamiz».

Rasmiy Pekin Buyuk Britaniya bosh vazirining bu so‘zlarini mamlakat ichki ishlariga aralashuv deb baholadi va Xitoy 1997 yilda tuzilgan, Hongkong boshqaruvi Buyuk Britaniyadan Xitoyga o‘tishi belgilangan kelishuv bo‘yicha barcha majburiyatlarini bajarib kelayotganini ta'kidladi.

«Biz Birlashgan Qirollikka vaziyatni keskinlashtirmaslikni, o‘z sovuq urushi va mustamlakachilik dunyoqarashini bas qilishni, Hongkong Xitoyga qaytgan reallikni qabul qilishni maslahat beramiz», – dedi Xitoy TIV rasmiy vakili Chjao Lijian chorshanba kungi brifingda.

Bloomberg`ning qayd etishicha, Boris Jonson hukumati pandemiyadan so‘ng Xitoy bilan aloqalarni qayta ko‘rib chiqish lozimligini aytmoqda. Xususan, britan rasmiylari XXRning telekom-giganti Huawei Technologies Co bilan rejalashtirilgan loyihalarni to‘xtatib qo‘yishi ehtimoli bor.