24 iyun kuni Toshkent viloyati Yuqori Chirchiq tumanidagi karantin markaziga Birlashgan Millatlar Tashkiloti, Yevropada Xavfsizlik va Hamkorlik Tashkiloti va Jahon Sog‘liqni Saqlash Tashkilotining O‘zbekistondagi vakolatxonalari hamda Inson huquqlari bo‘yicha milliy markaz vakillari tashrif buyurib, karantinga olingan fuqarolarning yashash tarzi, yaratilgan sharoitlar bilan tanishdi.
Dastlabki qismi mart oyida foydalanishga topshirilgan ushbu majmuaning umumiy maydoni salkam 15 gektarni tashkil etadi. Jami 20 ming o‘ringa mo‘ljallangan karantin hududida hozir 15 mingga yaqin fuqaro bo‘lib turibdi.
Ularga 1010 nafar tibbiy va texnik xodimlar xizmat ko‘rsatmoqda. Bu yerda Sog‘liqni saqlash vazirligi, Ichki ishlar vazirligi, Milliy gvardiya, Mudofaa vazirligi va Davlat sanitariya-epidemiologiya nazorati markazi xodimlari faoliyat olib borishmoqda.
Karantin markazida maxsus oshxona tashkil etilgan. Ovqat shu yerda tayyorlanadi. Boshqa keltirilgan yarim tayyor oziq-ovqat mahsulotlari bir martalik idishlarda, sanitariya qoidalariga rioya qilgan holda yetkazib beriladi.
Karantin hududida tibbiy masalalar bo‘yicha direktor o‘rinbosari Otabek Imomov karantindagi fuqarolarga yetkaziladigan oziq-ovqat ta'minoti haqida ma'lumot berdi.
«Ushbu karantin markazi 3ta hududga bo‘lingan. Hozir biz turgan joy «yashil» hudud. Ichkaridagi bloklar «qizil» hududdir. Oziq-ovqat maxsus mashinalarga ortiladi va «sariq» hudud bo‘ylab boriladi, «sariq» va «qizil» hudud chegarasigacha olib boriladi. Ichkaridagi xodimlar tomonidan ovqat olinadi. Mashina ovqatni berib bo‘lgach, dezinfeksiya qilinadi va qaytib keladi.
Berilayotgan ovqat bir marotabalik idishlarda beriladi, bo‘shaganidan keyin zararsizlantiriladi va yoqiladi.
Karantinda saqlanadigan fuqaroga bir kunlik oziq-ovqat xarajati 78280 so‘mni tashkil qiladi.
Karantin markazida fuqarolarning yashash sharoiti bilan tanishish maqsadida Inson huquqlari bo‘yicha O‘zbekiston Respublikasi Milliy markazi, BMT, YeXHT va JSSTning O‘zbekistondagi vakolatxonalari vakillari tashrif buyurishdi. Markaz xodimlari ularga bu yerdagi shart-sharoitlar haqida axborot berishdi.
Markaz rahbari Feruz Karimov xalqaro tashkilot vakillariga jo‘natmalar qay tarzda hududga olib kirilishini tushuntirdi.
«Karantinga olingan fuqarolarning qarindoshlari tomonidan ko‘plab noroziliklar bo‘ladi: «Olib kelgan jo‘natmamiz egasiga yetkazilmadi», deyishadi. Mumkin bo‘lmagan narsalar: spirtli ichimlik, tort, gazli ichimliklar olib kelishadi.
Karantindagi fuqaroning qarindoshi jo‘natma olib kelgan bo‘lsa, qaysi xonada ekanini bilmasa, koll-markazdagi telefondan qo‘ng‘iroq qilib bilib olishi mumkin. Har bir xonada bittadan uyali aloqa telefoni bor. Ichkarida har bitta blokka bitta rahbar tayinlangan. U o‘sha yerda fuqaroga kerakli narsalar ro‘yxatini tuzib chiqadi va koll-markazga qo‘ng‘iroq qiladi. Biz so‘ralgan narsalarni ichkariga yetkazib beramiz», – dedi markaz rahbari.
Ekspertlar fuqarolarning yashash sharoiti bilan tanishish maqsadida maxsus kombinezonlarda karantin hududida bo‘ldi. Ichkaridagi vaziyat bilan tinishgach, BMTning O‘zbekistondagi doimiy vakili Helena Freyzer, YeXHTning O‘zbekistondagi loyihalar koordinatori elchi Jon Makgregor va boshqa xorijlik rasmiylar karantin hududida tashkil etilgan sharoitlar haqida o‘z fikrlarini bildirib, xulosalarini aytishdi.
Taqdim etilgan ma'lumotlarga ko‘ra, ushbu karantin markazida hozirga qadar jami 67 mingga yaqin fuqaro karantinga olingan. Ulardan 2082 nafarida (3,1 foiz)dan koronavirus infeksiyasi aniqlanib, Virusologiya ilmiy-tekshirish institutiga jo‘natilgan.
