Avtotransportlar bo‘yicha cheklovlar haqida ertaga e'lon qilinadi. Butun respublika «qizil» hududga aylanishi aytildi

Ichki ishlar vazirligi matbuot xizmati rahbari Shohrux G‘iyosovning so‘zlariga ko‘ra, Maxsus komissiyaning 33-sonli qarori bilan belgilangan talab yuzasidan tez orada batafsil ma'lumot beriladi.

«Hozirda Maxsus komissiya tomonidan cheklovlarning aniq tartibi ishlab chiqilyapti. O‘ylaymanki, ertaga alohida brifing qilib, aniq tartibini sizlarga yetkazamiz.

Hozir paytdan foydalanib, barcha fuqarolarimiz avtotransport bilan bog‘liq ishlarini shu ikki kun ichida bitirib, oxiriga yetkazib olishlari maqsadga muvofiq», – dedi IIV rasmiysi 8 iyul kuni AOKAda bo‘lib o‘tgan matbuot anjumanida.

Shuningdek, hududlar o‘rtasida avtotransportlar qatnovi ham taqiqlanmoqda. Qishloq xo‘jaligi mahsulotlari yetishtiruvchilarga tegishli xizmat va shaxsiy avtotransportlar harakati bundan mustasno.

«Viloyatlararo transportlar harakati o‘zi taqiqlangan, lekin Toshkent shahri va Toshkent viloyati o‘rtasida ishga qatnovchilarga ruxsat berilgan edi. Endilikda bu ham taqiqlanadi. Ya'ni butun respublika hududi «qizil» hududga aylanadi», – dedi Shohrux G‘iyosov.

Uning qo‘shimcha qilishicha, maxsus stikerga ega avtomobillar harakatiga ruxsat etiladi.