Dunyodagi vaziyat: Hindistonda million, Braziliyada ikki million holat; Turkmaniston rahbari ham niqobda

Jons Hopkins universiteti ma'lumotlariga ko‘ra, pandemiya boshidan beri dunyo bo‘ylab koronavirusni yuqtirib olganlar soni 14 milliondan oshiqni tashkil etmoqda, 595 mingdan ortiq inson kasallik qurboniga aylangan.

Hindistonda millionta zararlanish
Hindiston shikastlanish ko‘rsatkichlari bo‘yicha dunyoda (AQSh va Braziliyadan keyingi) uchinchi o‘ringa chiqib oldi. 1,3 milliard aholiga ega davlat uchun bir million bemor unchalik ham qo‘rqinchli vaziyat bo‘lib ko‘rinmas, ammo kasallik to‘xtovsiz tarqaldi va sog‘liqni saqlash tizimi bemorlar bilan ko‘milib qolgan bo‘lishi mumkin.

Qat'iy karantin choralari yumshatilgandan so‘ng rasmiylar nisbatan ko‘proq shikastlangan hududlar uchun muayyan cheklovlarni qayta joriy etmoqda.

Braziliyada kasallanganlar 2 milliondan ortgan
Braziliya hududida virus tashxisi qo‘yilgan bemorlar ko‘rsatkichi 2 million nafardan oshib ketdi va ko‘rinishidan, kasallik tarqalishi sekinlashmayapti.

Braziliya aholisi taxminan 210 mln kishidan iborat. Mamlakat shikastlanish holatlari bo‘yicha dunyoda AQShdan keyingi ikkinchi o‘rinni egallab turibdi. Prezident Jair Bolsonaru virusning xavfli emasligiga ishonishda davom etmoqda, vaholanki bir hafta oldin uning koronavirusga topshirgan tahlillari musbat natijani ko‘rsatgan.

Rasmiy statistikaga muvofiq, koronavirus 79 mingdan ortiq inson hayotiga zomin bo‘lgan, ammo haqiqiy ko‘rsatkichlar bundan yuqori bo‘lishi mumkin.

AQShda rekord darajadagi shikastlanish ko‘rsatkichi
AQShda pandemiya boshlanganidan beri kunlik shikastlanishning eng yuqori ko‘rsatkichi qayd etildi - 74,5 ming holat. Jons Hopkins universitetti ma'lumotlariga ko‘ra, kasallanganlarning umumiy soni hozirda 3,57 mln nafardan ortiqni tashkil etmoqda.

Shikastlanish o‘sishi sur'ati 30 shtatda kuzatilyapti. Mamlakat bo‘ylab Covid-19'dan o‘lim holatlari soni bir kunda deyarli mingtani tashkil etdi. Pandemiya boshidan beri koronavirus 138 mingdan insonni hayotdan olib ketdi. 
50ta shtatning yarmidan ko‘pida niqob taqish majburiy qilib belgilangan. Ushbu qoida avvaliga hukumat tomonidan jamoat joylari va bino ichida niqob kiyish ta'kidlangan Luiziana shtatida kuchga kirdi. Shtatda barlar ham yopilgan. 

Ammo hamma ham ushbu qoidani maqsadga muvofiq deb hisoblamaydi. Jorjiya shtati gubernatori, respublikachi Brayan Kem Atlantaning demokratchi-meri Kishi Lans Bottomning niqob kiyish majburiyligi to‘g‘risidagi qaroriga sudda qarshi chiqdi.

Angliyada karantinning navbatdagi yumshatilishi
Angliyada jamoat transportidan yana bemalol foydalanish mumkin va 1 avgustdan boshlab ish beruvchilar o‘z xodimlarini ofisga qaytarish yoki yo‘qligi to‘g‘risida shaxsiy qaror qabul qilishlari mumkin, deb e'lon qildi Buyuk Britaniya bosh vaziri Boris Jonson. 

1 avgustdan boshlab aksariyat ko‘ngilochar maskanlar, shu jumladan bouling, muz saroylari va kazinolar qayta ochiladi. Go‘zallik salonlari ham faoliyatini qayta tiklashi mumkin. Bu imtiyozlar tungi klub va yopiq binodagi bolalar o‘yin maydonchalariga taalluqli emas.

Oktabr oyidan Angliya aholisi sport tadbirlari va stadionlardagi konsertlarda ishtirok etishi mumkin. 

Jonsonning aytishicha, hukumat mamlakat yil oxirigacha normal holatga qaytadi deb umid qilmoqda. Britaniyada koronavirus qurbonlari soni hozirda 45 mingdan oshgan. Bu Yevropada eng yuqori o‘lim darajasi bo‘lib turibdi. 

Turkmaniston rahbari «changdan himoyalanish» uchun niqob taqdi
Turkmaniston - hukumat rasmiylari koronavirusdan zararlanish holatlari yo‘qligini ta'kidlab kelayotgan sanoqli davlatlardan biri.

Ammo bu hafta mamlakat prezidenti Gurbanguli Berdimuhamedov birinchi marta mahalliy televideniye orqali baliq ovida niqob taqqan holatda ko‘rinish berdi, u yolg‘iz ov qildi. Mahalliy nashrlarning xabar berishicha, prezident niqobni «zararli chang tarqalgani» sababli taqqan.

Muvaffaqiyatli ovdan keyin prezident bolalar uyiga borgan va o‘ljalarini ularga bergan, bolalar ham niqobda bo‘lgan.

Turkmanistonda shu haftada tibbiy niqob taqish va ijtimoiy masofa saqlash tartiblari kuchga kirdi. Restoranlar, kafe va bozorlar yopildi.

Davlat telekanali ikkita eski ikki motorli samolyot qishloqlarni dezinfeksiya qilayotgani tasvirlarini namoyish etgan.

Turkmanistonda ham Shimoliy Koreyadagi kabi profilaktika choralari ko‘rilmoqda, ammo hukumat mamlakatda koronavirus yo‘qligini aytmoqda.

6-16 iyul kunlari davomida Turkmanistondagi vaziyatni o‘rgangan JSST missiyasi mamlakatda koronavirusdan zararlanish holatlari borligini tasdiqlamadi, ammo hukumatga mamlakatda koronavirus bordek ish tutish tavsiya qilindi.

12 iyul kuni Turkmaniston Sog‘liqni saqlash va tibbiy sanoat vazirligi janubi-sharq, shimoli-sharq va shimoldan kirib kelgan chang miqdori mamlakatda oshib ketgani sabab aholini tibbiy niqob taqib yurishga chaqirgandi. Ma'lum qilinishicha, havoda chang bilan birga «kasallik tarqatuvchi moddalar» ham bo‘lishi mumkin. Shuningdek, vazirlik 1 metr oraliq masofa saqlashga hamda shaxsiy gigiyena qoidalariga rioya qilishni so‘ragan. Bu vaqtda Ashxobodda tibbiy niqoblar narxi 14 baravar oshgan - avval niqoblarning beshtasi 2,5 manat (rasmiy kurs bo‘yicha 0,7 dollar, «qora bozor» kursi bo‘yicha 0,1 dollar)dan sotilgan bo‘lsa, chorshanba, 8 iyuldan boshlab birgina niqobning narxi 7 manat (mos ravishda 2 va 3 dollar)ni tashkil etgan.

Isroil dam olish kunlari karantinda
Isroilda yangi shikastlanish holatlari ortishi sababli karantin cheklovlari qayta joriy etildi. Juma kuni soat 17:00dan yakshanba kuni soat 05;00gacha, ya'ni Isroilda yangi ish haftasi boshlangunga qadar, do‘konlar (oziq-ovqat do‘konlaridan tashqari), sport zallari, sartaroshxonalar, hayvonot bog‘lari, bozorlar, sayyohlik joylari yopiladi, restoranlar faqat olib ketish uchun oziq-ovqat sotishi mumkin. 

Binolarda 10 nafardan ortiq va ochiq havoda 20 nafardan ortiq odam to‘planishi taqiqlangan. Plyajlar ham yopiq. 

Cheklovlar har hafta oxirida, keyingi alohida farmoyish e'lon qilingunga qadar amalda bo‘ladi, dedi bosh vazir Binyamin Netanyaxu. Ta'kidlanishicha, koronavirusdan o‘lim hollari ko‘payib borishi munosabati bilan ushbu choralar keyinroq qat'iy karantin joriy qilishga to‘g‘ri kelmasligini ta'minlash uchun zarurdir. 

Boshqa mamlakatlardagi ahvol

• Irlandiya bosh sanitar shifokori mamlakatda koronavirus bilan bog‘liq vaziyat ideal emasligidan ogohlantirdi va aholini ta'tilni uyda o‘tkazishga chaqirdi. Rasmiylarning fikricha, hozirgi tezlik bilan 10 avgustga borib mamlakatdagi kunlik yangi shikastlanish holatlari 150taga yetishi mumkin. 
• Ispaniyada may oyi boshidan beri Covid-19 bilan kasallanish bo‘yicha rekord miqdordagi holat qayd etildi - 580ta holat. Barselona ma'murlari virus tarqalishini to‘xtatish uchun shaharda odamlar harakatlanishini cheklash niyatida.
• Italiyada yangi holatlar soni ko‘paymoqda. Testlar bir kunda 230 kishida musbat natija ko‘rsatgan. Ularning aksariyati Lombardiya va Emiliya-Romaneda kuzatilgan. Pandemiya boshidan beri mamlakatda 35 mingdan ortiq kishi koronavirusdan vafot etdi.
• YeI Serbiya va Chernogoriyani ittifoq fuqarolari tashrifi uchun xavfsiz mamlakatlar ro‘yxatidan chiqarib tashladi.
• Fransiyaning infeksiyalanish avj olayotgan ikki mintaqasi - Mayyenn va Nuvel-Akitenda vaziyat tashvishli tus olmoqda.
• Iyul oyida Qirg‘izistonda koronavirusga chalinish holatlari to‘rt yarim baravarga oshdi, mamlakat sog‘liqni saqlash tizimi esa ortiqcha yuklamaga bardosh bera olmadi va natijada aholining aksariyat qismida vahima boshlandi.

Shinjonda cheklovlar
Koronavirus tarqalishi sababli Xitoyning Shinjon viloyati Urumchi shahrida 600dan ortiq aviareyslar bekor qilindi. Rasmiy ma'lumotlarga ko‘ra, olti nafar simptomli va 11 nafar simptomsiz bemor qayd etilgan. 

Karantin choralari, shuningdek, yagona metro liniyasini va ko‘plab avtobus yo‘nalishlarini to‘xtatishni o‘z ichiga oladi. Shahar aholisidan ba'zilar ijtimoiy tarmoqlarda ularga o‘z mahallalarini tark etmaslik to‘g‘risida ko‘rsatma berilgani haqida xabar berishdi. Boshqa nashrlarga ko‘ra, hukumat Shinjonning Qoshg‘ar shahriga kirish va chiqishni yopib qo‘ygan. 

Belgiyada ikkinchi to‘lqinmi?
Belgiya, aftidan, pandemiyaning ikkinchi to‘lqini ostonasida turibdi, dedi mamlakatning yetakchi virusologi Mark Van Ranst. Avvalroq bir hafta davomida yangi shikastlanishlar soni 32 foizga oshgani ma'lum bo‘lgandi.

Virusning tarqalish sur'ati Covid-19'ni yuqtirgan odam o‘rtacha yana bir kishini zararlashini anglatmoqda. Van Ranst ilgari bemorlarning har o‘ndan birini aniqlash mumkin bo‘lgan bo‘lsa, hozirda har uchinchisini aniqlashga erishilayotgani haqida yozgan. 

Sog‘liqni saqlash vazirligi virusologning xulosalariga qo‘shilmagan. Departament vakili so‘zlariga ko‘ra, yangi holatlar mahalliylashtirilgan va ular G‘arbiy Flandriya, Antverpen va Limburgda ro‘y bermoqda. 

Amerikaliklar Tramp harakatlaridan norozi
Washington Post va ABC News tomonidan o‘tkazilgan ommaviy so‘rov natijalariga ko‘ra, aksariyat amerikaliklar prezident Trampning pandemiya paytida qilgan harakatlaridan norozi. 

Mamlakat aholisining 60 foizi ko‘rilgan choralarni ma'qullamaydi va 38 foizi hamma narsadan mamnun ekanliklarini aytishdi. May oyida norozilar 53 foizni tashkil etgandi. Trampning harakatlarini qo‘llab-quvvatlamaganlarning 52 foizi bu borada qat'iy fikrda bo‘lgan.

O‘rtacha har 10 amerikalikdan olti nafari Trampning Covid-19 haqidagi so‘zlariga ishonmaydi.