Buxoro viloyati hokimi: 10 ming bemorga yetadigan dorilar tayyorlab qo‘yilgan, non ishlab chiqaruvchilar un bilan ta'minlamoqda

Buxoro viloyati hokimi Karim Kamolov buxoroliklarga murojaat bilan chiqdi. Bu haqda viloyat hokimligi axborot xizmati xabar bergan.

Buxoroda COVID-19 bilan og‘rigan bemorlar soni 591 nafarga yetgan bo‘lib, ulardan 530 nafari, ya'ni 90 foizi kasallikdan to‘liq sog‘aygan. 4 nafar fuqaro vafot etgan. Davolanayotgan bemorlardan 4 nafarining ahvoli og‘ir, 8 nafari o‘rta og‘ir holatda. Ayni vaqtda jami 5 ming 262 nafar buxoroliklar karantinga olingan.

Bemorlarni statsionar sharoitda davolash maqsadida qator tibbiyot muassasalarida jami 930ta o‘rin mobilizatsiya qilingan. Viloyat teri-tanosil kasalliklari dispanseri, ftiziatriya va pulmonologiya markazi va Buxoro shahar tibbiyot birlashmasida jami 300ta o‘rin hozirlab qo‘yilgan.

«Viloyatda COVID-19 bilan kasallangan bemorlarni davolash uchun 10 ming bemorga yetadigan, umumiy qiymati 5 milliard 200 million so‘mlik 49 turdagi dori vositalari zahirasi shakllantirildi. Mavjud tibbiyot muassasalarini kerakli dori vositalari va tibbiyot buyumlari bilan uzluksiz ta'minlash maqsadida bir oyda 9 milliard 500 million so‘m (3 ming nafar bemorni davolash uchun) mablag‘ talab etilishini inobatga olgan holda, viloyatda 3 oylik dori vositalari zahirasini yaratish maqsadida zarur choralar ko‘rilmoqda», degan Karim Kamolov buxoroliklarga qilgan murojaatida.

Viloyat hokimining ma'lum qilishicha, tez tibbiy yordam chaqiruvlarida aloqa va xizmat ko‘rsatish sifatini yaxshilash uchun qator choralar ko‘rilib, 103 xizmatining chaqiriqlarga uzluksiz va o‘z vaqtida javob berishi kafolatlanmoqda.

Shu maqsadda viloyatda 223-40-45 raqamli koll-markaz faoliyati yo‘lga qo‘yilib, bugungacha 1 ming 119ta murojaat qabul qilingan va aholiga zarur tibbiy maslahat berilgan. Ayni paytda hududda 153ta tez tibbiy yordam brigadasi va 15ta maxsus reanimatsion brigada faoliyat ko‘rsatmoqda.

Shuningdek, viloyatda Bosh prokuratura huzuridagi iqtisodiy jinoyatlarga qarshi kurashish departamenti va soliq idoralarida tuzilgan doimiy ishchi guruhlar tomonidan dehqon bozorlari va yirik savdo majmualarida narxlarni asossiz ravishda oshirganlarga nisbatan qonuniy chora ko‘rilayotgani ma'lum qilingan.

Ta'kidlanishicha, Buxoroda iyul oyda non mahsulotlari narxi oshishining oldini olish maqsadida 532ta korxona 7 ming 254 tonna un mahsuloti bilan ta'minlangan. Jumladan, 240ta qolipli non ishlab chiqaruvchi korxonaga 2 ming 831 tonna, 284ta chakana savdo korxonasiga 4 ming 386 tonna va 8ta makaron ishlab chiqaruvchi korxonaga 37 tonna un yetkazilgan.