«OVD-info» inson huquqlarini himoya qilish portaliga ko‘ra, Xabarovsk aholisini qo‘llab-quvvatlab o‘tkazilgan birdamlik mitinglarida 10dan ortiq shaharda jami 55 kishi hibsga olingan. Shulardan 21 nafari Sankt-Peterburgda va 13 nafari Moskvada.
Moskvada namoyishchilar Novopushkinskiy xiyoboniga to‘plangan. Xiyobonni o‘sha zahoti politsiya va Rosgvardiya xodimlari qurshab olgan hamda namoyishchilarni hibsga ola boshlagan.
Hibsga olinganlardan birining «OVD-info»ga ma'lum qilishicha, unga «yuqori ogohlantirish rejimi» joriy etilganida o‘zini tutish qoidalariga rioya qilmaslik moddasi bo‘yicha ish qo‘zg‘atilgan.
Namoyishchilar Stariy Arbat ko‘chasi bo‘ylab yurishga harakat qilgan, ammo politsiya ularning yo‘lini to‘sib qo‘ygan. Kechki payt faollar Moskva metropolitenidagi poyezdlardan biriga «Xabarovsk bizga ham keladi» yozuvli plakatni ilib qo‘yishgan.
Shanba kuni Sankt-Peterburg va Krasnodarda ham Xabarovskdagi namoyishlarni qo‘llab o‘tkazilgan birdamlik mitinglari hibsga olishlar bilan yakunlangan.
Sankt-Peterburgda namoyishchilar Neva prospektida sharlar va kabutar ramzi tushirilgan plakatlarni ko‘tarishgan (Rossiyada bugun «kabutarlarga don tashlash» Xabarovskdagi namoyishchilarni qo‘llab-quvvatlash ramziga aylanib boryapti). Ularning ortidan politsiyachilarning hibsga olish mashinasi harakatlangan. Politsiya ovoz kuchaytirgichda namoyishchilardan tarqalishni talab qilgan.
Namoyishchilar Griboyedov kanalining qirg‘og‘iga burilganda, politsiyachilar Neva prospektiga boradigan yo‘lni to‘sib qo‘yib, ularni hibsga ola boshlagan.
Xabarovskdagi namoyishchilar bilan birdamlik mitinglari Qozon shahrida ham o‘tkazilgan. «OVD-info»ga ko‘ra, u yerda yetti yashar bolasi bor ayolni ham politsiya bo‘limiga olib ketishgan. Xabarovskdagi namoyishlarni qo‘llab o‘tkazilgan birdamlik mitinglari Rossiyaning Yekaterinburg, Krasnodar, Chelyabinsk, Vladivostok kabi jami 15ta shahrida bo‘lib o‘tgan.
Shanba kuni Xabarovskda namoyishlar ikki marta bo‘lib o‘tgan. Yomg‘ir ostida minglab odamlar qatnashgan birinchi namoyish peshinda boshlanib, viloyat ma'muriyati binosi oldidagi miting bilan yakunlangan. Ikkinchi namoyish kechki payt bo‘lib o‘tgan.
