Shu yil 31 may kuni So‘x tumanida, Qirg‘iziston bilan chegarada joylashgan Chashma bulog‘i oldida mojaro kelib chiqqan edi. Dastlabki ma'lumotlarda hodisa oqibatida so‘xliklardan 187 kishi jarohatlangani, ulardan 15 nafari vertolyotda Farg‘ona shahriga olib borilgani aytilgandi.
Prokuratura 22 nafar shaxsga Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga o‘zining xizmat vazifasini bajarish yoki fuqaroviy burchini bajarishdan voz kechishga, shuningdek, qonunga xilof harakatlar sodir etishga majbur qilish) va 244-moddasi (ommaviy tartibsizliklar) bilan ayblov e'lon qilgan.
16 noyabr kuni bo‘lib o‘tgan navbatdagi sud majlisida sudya Tojiddin Vahobov dastlab davlat ayblovchisiga so‘z berdi. U to‘plangan dalillarga asosan, So‘x voqealarida bir qancha avtomashina va yashash xonadonlariga moddiy zarar yetkazilganini ta'kidladi.
Shundan so‘ng sudya har bir ayblanuvchidan e'lon qilinayotgan ayblovga iqror yoki iqror emasligini birma-bir so‘rab chiqdi. Ayblanuvchilarning ayrimlari iqror emasligini, ayrimlari esa qisman iqror ekanliklarini bildirishdi.
Sud majlisida sudya ayblanuvchilar Maxsum Ahmedov, Ravshan Mirsharipov hamda Nazirjon Jo‘rayevlardan 31 may kun sodir bo‘lgan voqea bo‘yicha ko‘rgan-bilganlarini aytib berishni so‘radi.
Ayblanuvchi Maxsum Ahmedov 31 may kuni soat 14:30larda voqealar sodir bo‘lishi arafasida uyda bo‘lgani, Chashma bulog‘ida odamlar yig‘ilayotganini eshitib «DAMAS» rusumli avtomashinaga o‘tirib to‘polon bo‘layotgan joyga borganini, o‘zbek va qirg‘izlar o‘rtasidagi to‘qnashuvni o‘z ko‘zi bilan ko‘rmagani, viloyatning o‘sha vaqtdagi hokimi Shuhrat G‘aniyev janjalli joyga kelgani haqidagi xabarni uyga qaytayotgandagina eshitganini ta'kidladi.
