16:01 / 01.12.2020
34365
«Бу атайлаб қилинган»: Алишер Султонов «ақлли» газ ҳисоблагичларининг портлаши бўйича изоҳ берди

Энергетика вазири Алишер Султонов нима учун Ўзбекистонда газ ҳисоблагичлари портлаётгани ҳақида гапириб берди.

Шу йил 24 сентябр куни ижтимоий тармоқларда Андижон вилоятида фавқулодда ҳолат юз бергани ҳақида хабар тарқалди. Унда «Технопарк» МЧЖ томонидан ўрнатилган «ақлли» газ ҳисоблагич ўрнатилишидан 3 соат ўтгач портлаб кетгани ҳақида сўз юритилган.

Бундан ташқари, ноябр ойининг ўрталарида Андижонда ўрнатилган 40дан ортиқ «ақлли» газ ҳисоблагичлари ишламай қолди.

«Бу атайлаб қилинган. Бу исботланди ва суриштирув ўтказилди. Биз кўрсатув қилмоқчимиз ва буни кўрсатмоқчимиз. Ушбу фуқаролар биз билан қандай курашмасин, ҳисоблагичларни ўрнатамиз ва тартибга келтирамиз. Ўғриликни тўхтатамиз ҳамда одамлар истеъмол учун тўлашига ҳаракат қиламиз», - деди вазир Alter Ego лойиҳасига берган интервьюсида

Шунингдек, Алишер Султонов нега «Технопарк» тендерда ғолиб чиққанлигини айтиб берди. У тендер адолатли ўтганини, компания эса бир нечта рақобатчилар билан танловда қатнашганини таъкидлади. 

«Тендер ўтказиш бўйича маълум бир шартлар мавжуд, улар («Технопарк» - таҳр.) ютиб чиқди. Уларнинг ютгани яхши, биринчи навбатда, бу италиялик ишлаб чиқарувчилар билан қўшма компания. Бу бизнинг мамлакатимизда ишлаб чиқарилаётган замонавий Европа ҳисоблагичлари. Компания одамларни иш билан таъминламоқда, Ўзбекистонда солиқлар тўланмоқда, аммо бу уларнинг ғалабаси учун сабаб эмас. Улар уч-тўртта компания билан бўлган адолатли курашда ғалаба қозонди», – дея хулоса қилди энергетика вазири. 

Жорий йилнинг феврал ойида президент Тошкентда «ақлли» газ ҳисоблагичларини ишлаб чиқариш бўйича «Технопарк»га ташриф буюрди. Давлат раҳбари корхона ҳисоблагичларни сотиш билан чекланиб қолмасдан, балки уларни ўрнатишдан то техник хизмат кўрсатишгача бўлган барча жараёнларни қамраб олиши кераклигини таъкидлаб ўтди.

Top