Ortiqcha hujjat talab qilgan 10ga yaqin OTMga intizomiy jazo choralari ko‘rildi - Adliya vazirligi

Adliya organlari tomonidan Samarqand viloyati misolida so‘rov orqali o‘tkazilgan o‘rganish natijalariga ko‘ra, fuqarolardan talab qilish taqiqlangan hujjatlar olingani, qonun hujjatlari bilan belgilangan talablarga zid ravishda rasmiy hujjatlarning nusxalari talab qilingani va boshqa byurokratik to‘siqlar mavjudligi aniqlangan.

«So‘nggi yillarda oliy ta'lim tizimini modernizatsiya qilish, qabul jarayonlariga zamonaviy texnologiyalarni joriy etish bo‘yicha keng ko‘lamli ishlar olib borilmoqda. Shunga qaramasdan, ayrim oliy ta'lim muassasalari katta hayotga yo‘l olayotgan abituriyentlardan ortiqcha hujjat so‘rash hamda zamon talablariga to‘g‘ri kelmaydigan qo‘shimcha talablar o‘rnatish orqali eskirgan usullarda ishlashda davom etishmoqda.

Misol uchun, Samarqand davlat chet tillar universiteti abituriyentlardan fuqarolik pasportidan nusxa, soliq to‘lovchining hisobga qo‘yilgani to‘g‘risida guvohnoma, jismoniy shaxsning jamg‘arib boriladigan pensiya tizimiga qo‘yilgani to‘g‘risida ma'lumotnoma kabi hujjatlarni taqdim etishni asossiz ravishda talab qilgan.

Oliy ta'lim muassasasi qabul komissiyasi abituriyent haqidagi zarur ma'lumotlarni Davlat test markazining maxsus dasturiga kiritib, abituriyentga asl hujjatlarni qaytarishi nazarda tutilgan.

Shunga asosan, Adliya vazirligi tomonidan oliy ta'lim muassasalari tomonidan ortiqcha byurokratik g‘ov va to‘siqlarga barham berish bo‘yicha Oliy va o‘rta maxsus ta'lim vazirligiga tegishli taqdimnoma kiritildi.

Shuningdek, Oliy va o‘rta maxsus ta'lim vazirligi tomonidan mazkur qonun hujjatlari buzilishining oldini olish va bartaraf qilishga qaratilgan chora-tadbirlar belgilab olindi», deyiladi vazirlik xabarida.

Ma'lum qilinishicha, abituriyentlardan ortiqcha hujjat talab qilgan 10ga yaqin OTMning rahbar-xodimlariga turli intizomiy jazo choralari ko‘rilgan.