«Bekobodsement»ning 51 foiz aksiyasi zavod aksiyadoriga qaytarildi

O‘zbekiston ishtirokida 2013 yildan buyon davom etayotgan xalqaro arbitraj ishi o‘zaro kelishuv bilan tugatildi. Bu haqda «O‘zsanoatqurilishmateriallari» xabar bermoqda.

Ma'lum qilinishicha, 2013 yilda Qozog‘istonning o‘n ikki fuqarosi davlat organlarining «Bekobodsement» va «Quvasoysement»ga nisbatan qilgan harakatlari munosabati bilan ICSID (Investitsiya bahslarini hal qilish bo‘yicha xalqaro markaz)ga arbitraj da'vosini kiritgan, da'vogarlar o‘sha paytda mazkur jamiyatlarning aksariyat ulushi egalari bo‘lgan.

Da'vogarlar davlat organlarining harakatlari 1997 yil 2 iyundagi O‘zbekiston va Qozog‘iston hukumatlari o‘rtasidagi «Investitsiyalarni rag‘batlantirish va o‘zaro himoya qilish to‘g‘risida»gi bitimni buzganligini ta'kidlagan. O‘zbekiston tomoni da'vogarlarning barcha ayblovlarini rad etib, investitsiyalarni himoya qilish to‘g‘risidagi bitimning buzilishi holatlari mavjud emasligini ta'kidladi va nizoni tinch yo‘l bilan hal qilishga tarafdorligini bildirgan.

Olib borilgan muzokaralar natijasida tomonlar o‘zaro manfaatli shartlar asosida ICSID arbitrajini tugatish bo‘yicha kelishuvga erishdi. Ushbu kelishuv doirasida O‘zbekiston tomoni «Bekobodsement»ning 51 foiz aksiyalarini mazkur jamiyatning aksiyadoriga qaytardi.

2020 yilning oktyabriga kelib tomonlar kelishuv bitimida nazarda tutilgan barcha shartlarni bajardi. Shundan so‘ng, 2020 yilning 9 dekabrida ICSID tribunali arbitraj muhokamasini qayta murojaat qilish huquqisiz tugatish haqida qaror qabul qildi.