15:34 / 27.12.2020
25137
Йўлдошева иши: Диспансер бош шифокори марҳумни кўчиришда вилоят ССБдан топшириқ бўлганини айтди

Марҳум Ф.Рустамов вилоят ССБ бошлиғининг биринчи ўринбосари Низом Абдуллаев топшириғи асосида диспансерга қабул қилинган, деб судда гувоҳлик берди диспансер бош шифокори Феруза Шонасирова. Абдуллаев эса аввалроқ беморнинг бошқа шифохонага кўчирилишини Йўлдошеванинг хатоси деб айтганди.

Тошкент вилояти юқумли касалликлар шифохонаси бош шифокори Гулжаҳон Йўлдошева иши бўйича навбатдаги суд мажлиси бўлиб ўтди. Бу ҳақда Kun.uz мухбири хабар бермоқда.

Бу галги суд мажлисида Тошкент вилояти руҳий-асаб касалликлари диспансери бош шифокори ва диспансернинг бошқа ходимлари марҳум Ф.Рустамовнинг касалхонага кўчирилиши билан боғлиқ ҳолатлар бўйича кўрсатма берди.

Тошкент вилояти руҳий-асаб касалликлари диспансери бош шифокори Феруза Шонасирова марҳум Ф.Рустамовни шифохонага қабул қилгани ва бунга эътироз билдирмаганини таъкидлади.

Ф.Шонасирова беморни диспансерга Тошкент вилояти соғлиқни сақлаш бошқармаси бошлиғининг биринчи ўринбосари Низом Абдуллаевнинг топшириғи билан қабул қилганини айтди.

Шунингдек, карантин даврида Тошкент вилояти юқумли касалликлар шифохонасида қоровул бўлиб хизмат қилган Фаррух Aширов марҳум Ф.Рустамовни тез тиббий ёрдам машинаси олиб кетишга келганида Йўлдошевага телефон қилиб хабар беришга уринганини, беморни тез тиббий ёрдам машинаси олиб чиқиб кетаётган вақт Йўлдошевага қўнғироқ қилиб туша олмаганини билдирди.

Бу икки гувоҳдан ташқари, суд мажлисида диспансернинг яна 4 нафар вакили кўрсатма берди. Қолган гувоҳларнинг кўрсатмалари кейинги суд мажлисига қолдирилди.

Маълумот учун, вилоят ССБ бошлиғининг биринчи ўринбосари Низом Абдуллаев сентябр ойида Qalampir.uz'га берган интервьюсида беморни инфекцион касалхонадан руҳий диспансерга кўчириш – «Гулжаҳон Йўлдошеванинг хатоси» бўлганини айтган эди.

Аввалги суд мажлисларида Гулжаҳон Йўлдошеванинг ўзи марҳумнинг ўлимига алоқаси йўқлигини таъкидлади. Унинг бу гапларини шифохона инфекционисти Шейхназар Рўзметов тасдиқлади.

Карантин даврида инфекцион шифохонада ҳамшира бўлиб ишлаган Айдана Есеналиеванинг айтишича, у Йўлдошеванинг марҳум Ф.Рустамовни бошқа шифохонага кўчириш ҳақидаги гапини «эшитиб қолган». Йўлдошева бу гапни айтмаганини, Есеналиеванинг кўрсатмаси ёлғонлигини билдирди. Шифокор бу гапни қачон, қаерда, қайси тилда ва кимларнинг олдида айтгани ҳақида адвокат берган саволларга ҳамшира аниқ жавоб бера олмади.

Top