Bosh vazir o‘rinbosari Yunusoboddagi fojiadan so‘ng yig‘ilish o‘tkazdi. Ijarada yashayotgan talabalar bo‘yicha o‘rganish tizimi joriy etiladi

Oliy va o‘rta maxsus ta'lim vazirligi xabariga ko‘ra, muhokama jarayonida oliy ta'lim muassasalari rektorlari, prorektorlari, dekan, shuningdek, yoshlar bo‘yicha yetakchilari tomonidan talabalarning yashash sharoitlarini tahlil qilish o‘z holiga tashlab qo‘yilgani tanqid qilindi.

“Xususan, talabalar ijarada qayerda yashamoqda, kimnikida turibdi, yashash sharoiti qanday, darsdan keyin nima ish bilan mashg‘ul bo‘ladi, bo‘sh vaqtini qanday o‘tkazadi, bu talabalarning o‘qish jarayoniga qanday ta'sir ko‘rsatmoqda, kabi jiddiy masalalar ko‘rib chiqildi.

Ayniqsa, mas'ullar tomonidan talabalarning xususiy uy-joylarda yashash sharoitlari bilan bevosita joyiga chiqqan holda o‘rganilmayotganligi ko‘rsatib o‘tildi.

Talabalar tomonidan ijaraga olinayotgan xonadonlarning yong‘in va boshqa texnik xavfsizlik talablariga javob bermasligi, talabalarda birlamchi yong‘in va boshqa texnik xavfsizlik bo‘yicha bilimlarining yetarli emasligi natijasida turli noxush hodisalar ro‘y bermoqda”, deyiladi xabarda.

Oliy va o‘rta maxsus ta'lim vazirligi, Ichki ishlar vazirligi, Sog‘liqni saqlash vazirligi hamda Favqulodda vaziyatlar vazirligining “Talabalar yashash sharoiti va harakatlanishi monitoringini yo‘lga qo‘yish va bu boradagi ishlarni takomillashtirish” yuzasidan qo‘shma qarori qabul qilinadi. 

Qayd etilishicha, qo‘shma qarorda har bir hududda ishchi guruh tuzib, ijarada va yaqin qarindoshinikida yashayotgan talabalar bo‘yicha o‘rganish tizimini joriy qilish ko‘zda tutiladi.

Avvalroq, Yunusoboddagi kvartirada besh talaba jasadi topilgani, ular noma'lum moddadan zaharlangani taxmin qilinayotgani xabar berilgandi.