Buxoroda ro‘y bergan tabiiy ofatga bir yil to‘ldi: Bugun Olot qay qiyofada?

Nihoyatda kuchli dovul Olot, Qorako‘l, Romitan va Shofirkon tumanlaridagi ko‘plab qishloqlarga ziyon yetkazadi. Odamlar yashab turgan uylarning shifti uchib ketgan, ekinlarga ziyon yetgandi. Ayniqsa, Olot va Qorako‘l tumanlarida zarar ko‘lami ko‘proq bo‘ladi.

Prezident Shavkat Mirziyoyev Olot tumaniga borib, vaziyatni o‘z ko‘zi bilan ko‘rgan, aholini tinchlantirgan, barcha zaruriy yordam ko‘rsatilishiga va'da bergandi.

Ko‘p o‘tmay Olotga qurilish materiallari ajratiladi. Yurtdoshlarimiz hasharga otlanadi. Ko‘plab vatandoshlarimiz buxoroliklarga xayriya qilib, buxoroliklarga yelka tutishadi.

Jumladan, Kun.uz sayti tahririyati ham Buxoroga yordam xayriya aksiyasini o‘tkazib, Olot, Qorako‘l va boshqa qo‘shni tumanlarda talafotdan aziyat chekkan xonadonlarga hamyurtlarimizning beminnat yordamlarini yetkazib bergandi. Kutilmagan tabiiy ofat xalqimizning insonparvarligini yana bir bor namoyon etib bergandi.  

Oradan bir yil o‘tib biz yana Olot tumanida bo‘ldik. Tabiiy ofat to‘liq bartaraf etilgan. Ammo bir oni ham hali hech kimning yodidan chiqmagan. Olotliklar o‘sha kunni qo‘rqinch tush kabi eslashadi.

«O‘sha kuni iftorlik payti edi. Mana shu siz ko‘rib turgan hovlimiz bir zumda tomlar uchib tushib, vayrona avholga kelib qoldi. Ko‘chaga chiqadigan holat emas edi. Davlat tashkilotlarining tom qismi ham uchib bizning uyimiz oldigacha kelgandi. Ertasi kuni kuchli yomg‘ir yog‘ib, uylarimiz tomidan o‘tib, xonadon ichlarini ham yomon avholga keltirdi.

Butun Olot xalqi aziyat chekkandi. Ammo talafotdan keyin butun O‘zbekistondan ustalar, yordamchilar kelib tun-u kun ishlashdi. 10 kun deganda elektr toki qayta tiklandi. Hokimiyat vakillari tomonidan berilgan yordam sabab, qo‘shni tumanlardan odamlar kelib, boshqa viloyatlardan harbiylar yordami bilan bir oy deganda ko‘chalar uylar qayta tiklandi. Mana shu hodisaga bir yil bo‘libdi. Shukr deymizki, bizdan hech kim vafot etmagandi. 74 yoshga kirgan onam ilgari bunday voqea bo‘lganini eslamaydilar», — deydi hamshira bo‘lib ishlaydigan Feruza Rajabova.

«Biz mana shu siz ko‘rib turgan namunaviy uylarda yashaymiz. Kuchli shamol mana shu mahalladagi birorta uyga zarar yetkazmay qo‘ymadi. Kunduzi turib qarasak tom yopmalarimiz 30-40 metr uzoqlikda chilparchin bo‘lib yotibdi.

Lekin oradan bir-ikki oy vaqt o‘tib, hokimiyat yordami bilan, o‘zimizning harakatlarimiz bilan uylarimizni avvalgi holiga keltirdik.

Qishloq tomonlarda akam yashaydilar. Ularning issiqxonasi ham katta talafot ko‘rgandi. Davlat tomonidan o‘sha issiqxona ham qayta tiklab berildi», — dedi o‘qituvchi Muborak Hamroyeva.

Tuman hokimi Nargiza Ne'matova bir yil ichida qilingan ishlar bo‘yicha qisqacha gapirib berdi.

«Olot to‘foniga ham bir yil bo‘ldi. O‘sha kungi holatni eslashning o‘zi qo‘rqinchli. Tuman hokimligi ro‘parasidagi binoda ishlaydigan ishchilar hokimiyat binosi tomon qochib kelishayotganda binoning tom qismidagi uyali aloqa antennasi ularning shundoq yoniga qulab tushgandi. Yoki bo‘lmasa, birgina farzandi bilan yashaydigan yolg‘iz ayol o‘shanda bolasini do‘konga yuborgan payti kuchli shamol boshlanadi. O‘sha kuni tuni bilan haydovchim bilan ikkimiz bolani izlagandik. Yarim tunda sog‘-salomat topib, onasiga topshirgandik.

Hodisaning ertasi kuniyoq prezidentimiz Olotga yetib keldi. Faollar bilan uchrashib, hammaga dalda berdi. Butun hukumat rahbariyati, vazirlar ayniqsa davlat maslahatchisi Tursinxon Xudaybergenov ikki oy Olotda yashadi.

Ko‘rib turganingizdek, o‘shanda zararlangan binolar, aholi xonadonlarini to‘liq ta'mirlab berdik. Davlatimiz tomonidan ushbu talafot oqibatlarini bartaraf etish uchun Buxoro viloyatiga 100 milliard so‘m ajratilgan bo‘lsa, shu mablag‘ning 79 milliard so‘mi bizning tumanga sarflandi. Bir so‘z bilan aytganda, Olot xalqi bu sinovlardan tetik bo‘lib chiqdi», — dedi N.Ne'matova muxbirimiz bilan suhbatda.

Guvohi bo‘ldikki, Olot tumani oradan bir yil o‘tgach tabiiy ofat oqibatlaridan to‘liq qutulgan. Allaqachon o‘sha kunlar dahshati, tashvishlari ortda qolgan. Davlatimiz, fuqarolarimizning yordami bilan tiklanmagan uylar qolmagan. Tuman yangilanish tomon yuz tutgan.

Behzod Adizov, Kun.uz muxbiri.