15:03 / 06.05.2021
10215
Франциянинг таҳдидидан сўнг Британия Жерси оролига кемалар жўнатмоқда

Британия бош вазири Борис Жонсон Жерси ороли бош вазири Жон Ле Фондре ва ташқи ишлар вазири Ян Горст билан мулоқоти чоғида оролни қўллаб-қувватлашини таъкидлаган.

Франция Жерси оролини электр таъминотисиз қолдириш ҳақида таҳдид қилганидан сўнг Буюк Британия оролга иккита патрул кемасини жўнатмоқда. Бу ҳақда Британия ҳукумати баёнотида маълум қилинди.

Британия бош вазири Борис Жонсон Жерси ороли бош вазири Жон Ле Фондре ва ташқи ишлар вазири Ян Горст билан мулоқоти чоғида оролни қўллаб-қувватлашини таъкидлаган.

«Ҳар қандай қамал ўзини мутлақо оқламайди», — деган у.

Би-би-си хабарига кўра, оролга HMS Severn ва HMS Tamar патрул кемалари жўнатилади. 

Жерси ороли Франциянинг шимолий соҳилидан 23 км ва Буюк Британия жанубий соҳилидан 140 км масофада жойлашган. У Буюк Британия қироллиги мулки ҳисобланади, аммо Бирлашган қироллик таркибига кирмайди.

Аввалроқ Франция ушбу ҳудудда балиқ овлаш қоидалари ўзгаргани сабабли оролга электр энергияси беришни тўхтатиши мумкинлигини билдирганди. Парижнинг фикрича, орол соҳиллари яқинида француз кемаларининг балиқ овлаши тақиқланиши Brexit тўғрисидаги келишувга зид.

Жерси раҳбарияти Буюк Британия ва ЕИ ўртасидаги савдо келишувига мувофиқ янги қоидалар жорий этган. Қоидаларга кўра, француз кемалари эгалари ушбу ҳудудда илгари балиқ тутиш билан шуғулланганини тасдиқлаши лозим. Шундан сўнггина Жерси ҳукумати уларга лицензия беради. 

Франция денгиз вазири Анник Жирарден Париж бунга қарши жавоб чораларини кўриши мумкинлигини айтган.

У Франциядан оролга электр етказиб берувчи сувости кабелини эслатган ва керак бўлса, электр узатиш тўхтатилишини айтган. Reuters агентлигининг маълумот беришича, Жерси 95 фоиз электр энергиясини Франциядан олади.

Top