May oyida o‘tkazilgan kelishuvlarga ko‘ra, ikki davlat o‘rtasida «Samarqand–Olmaota» va «Turkiston–Toshkent» yo‘nalishlarida muntazam aviaqatnovlar yo‘lga qo‘yilmoqda.
«Samarqand–Olmaota–Samarqand» yo‘nalishida Uzbekistan Airways va Air Astana aviakompaniyalarining har biri tomonidan haftasiga 2 marta, «Turkiston–Toshkent–Turkiston» yo‘nalishida Air Astana aviakompaniyasi tarkibiga kiruvchi Fly Arystan aviakompaniyasi tomonidan haftasiga 2 marta qatnov yo‘lga qo‘yiladi.
Ikki davlat o‘rtasida muntazam aviaqatnovlar tiklangandan buyon sanitariya-epidemiologik talablarga qat'iy rioya qilgan holda Uzbekistan Airways va Air Astana aviakompaniyalarining har biri tomonidan «Toshkent–Olmaota» yo‘nalishida haftasiga 7 martadan, «Toshkent–Nur-Sulton» yo‘nalishida esa haftasiga uch martadan muntazam yo‘lovchi qatnovlari bajarilmoqda.
Shuningdek, Uzbekistan Airways va SCAT Airlines aviakompaniyalarining har biri tomonidan «Urganch–Aqtau–Urganch» (haftasiga 2 marta) yo‘nalishida hamda SCAT Airlines aviakompaniyasi tomonidan «Aqtau–Nukus–Aqtau» (haftasiga 1 marta) yo‘nalishida muntazam aviaqatnovlar amalga oshirilmoqda.
«Air Astana aviakompaniyasi «Olmaota–Samarqand» yo‘nalishidagi qatnovlarni 8 iyundan boshlab amalga oshiradi», deyiladi Transport vazirligi axborot xizmatining Kun.uz’ga bergan ma'lumotida.
Eslatib o‘tamiz, «Toshkent–Dubay–Toshkent» yo‘nalishi bo‘yicha muntazam reyslar soni ham ko‘paytirilgani haqida xabar berilgan edi.
