Navoiydagi namunali uylar muammosi - «Qishloq qurilish invest» aybni ikkinchi tomonga to‘nkadi

Oldinroq Kun.uz Karmana tumani Shibzon mahallasining Yangi Urganji massivida qurilgan namunaviy uylarda yer osti suvlari yaqinligidan yashash imkonsiz bo‘layotganini ma'lum qilgandi. «Qishloq qurilish invest» MChJ IK Navoiy viloyati filiali mazkur masala yuzasidan rasmiy munosabat bildirib, aybni Karmana tuman melioratsiya-irrigatsiya bo‘limiga to‘nkadi. 

Ma'lum qilinishicha, ushbu namunaviy ular 2019 yilda pudrat tashkilot «AKFA KRISTAL MONTAJ» MChJ tomonidan qurilgan. 
 
«Ushbu uy-joylar hududdagi fermer xo‘jalik ekin yerlariga tutash bo‘lgan maydonda qurilgan. Atrofda zovur mavjud bo‘lib, bugungi kunga qadar Karmana tuman melioratsiya-irrigatsiya bo‘limi tomonidan biron marta tozalanmagan. Fermer xo‘jaligi tomonidan ekin yerlarining sho‘rini yuvish va ekinlarni sug‘organ vaqtda yer osti suvi sathining ko‘tarilishi yuzaga kelmoqda. Qolaversa, atrofda zovur tozalanmaganligi sababli, yuzaga chiqayotgan sho‘r uylarning sifatiga jiddiy ta'sir qilyapti. Haqiqatda, namunali uylar va fermer xo‘jalik ekin yerlari orasida yarmi ko‘milib qolgan zovur qazib chiqilsa, yer osti suvlari muammosi bartaraf etilishi mumkin. Namunaviy uy-joy atrofidagi zovurni qazib tozalash «Qishloq qurilish invest» MChJ IK Navoiy viloyati filiali vakolatiga kirmaydi», — deyiladi rasmiy munosabatda.

Shuningdek, munosabatda ushbu massivdagi yer maydonida bosh rejaga asosan bolalar maydonchasi uchun joy ajratish ko‘zda tutilmaganligi ta'kidlanadi.

Eslatib o‘tamiz, Karmana tumani melioratsiya bo‘limi boshlig‘i Mo‘min Ikromov ushbu uylar qurilishi uchun yer tanlashda melioratsiya-irrigatsiya sohasi mutaxassislarining xulosasi yoki taklifi olinmaganligini, hozirgi kunda ushbu hududda yopiq zovur qurish uchun qariyb 1 milliard so‘m, ochiq zovur qurish uchun esa 700 million so‘m mablag‘ sarflanishi mumkinligini ma'lum qilgandi.