Antimonopoliya qo‘mitasida ayni paytda 21ta ish o‘rni vakant. Qo‘mita raisi o‘rinbosari bu holatni «tabiiy» deb baholadi

«O‘tgan hafta oxirida ayrim blogerlar va OAV tomonidan qo‘mitamizda xodimlar ommaviy ravishda ishdan ketayotgani haqida xabarlar tarqaldi. Lekin bu haqiqatdan yiroq, ya’ni xodimlar lavozimlarini ommaviy ravishda tark etayotgani mutlaqo haqiqatga to‘g‘ri kelmaydi. Bu tabiiy ravishda yuzaga keladigan jarayon. Kimdir lavozimini tark etadi, kimdir uning o‘rniga keladi.

Qo‘mitamiz 2019 yilda qayta tashkil etilgandan so‘ng xodimlarni moddiy rag‘batlantirishni birmuncha yaxshiladik. Ikki yil ichida ijtimoiy paket bosqichma-bosqich raqobatbardosh darajaga chiqarildi. Kerak bo‘lsa, davlat organlari bilan ham, xususiy sektor bilan ham bemalol raqobatlasha oladigan ijtimoiy paket shakllantirildi.

Xodimlar ishdan ketayotgani tabiiy ro‘y berayotganini quyidagicha tushuntirib o‘taman. Qo‘mitadan ishdan ketgan aksariyat rahbar-xodimlar boshqa davlat organlari, yirik kompaniyalarga teng yoki kattaroq lavozimlarga ishga o‘tishdi. Bu tabiiy hol. Bu yerdan qandaydir negativni izlashimiz umuman noto‘g‘ri. Qo‘mita shtat rejimida faoliyat yurityapti. Faoliyatimizga ta’sir qiluvchi hech qanday omil yo‘q bugungi kunda. Ketayotganlar o‘z ixtiyori bilan ketyapti, qo‘mitadan norozi emas deb aytsak, vaziyatga nisbatan obektiv baho bergan bo‘lamiz», deydi Farrux Qoraboyev Kun.uz muxbiri bilan suhbatda.

Qo‘mita raisi o‘rinbosari lavozimini tark etgan xodimlardan ikki nafari Toshkent shahrining Olmazor hamda Toshkent viloyatining Quyi Chirchiq tumanlarida hokim o‘rinbosari etib tayinlangani, ayrimlari Olmaliq kon metallurgiya kombinati, Respublika tovar-xomashyo birjasi AJ, «O‘zbekiston respublika valuta birjasi» AJ ishga ketishgani, yaqinda lavozimini tark etgan xodimlar «Uzbekistan Airports» AJga ishga kirmoqchiligini aytib o‘tdi.

Qo‘mita rasmiysi dastavval yil boshidan buyon 25 nafar xodim ishdan ketgani, biroq ayni davrda 21 nafar yangi xodim ishga olinganini ta’kidlagan bo‘lsa, intervyu davomida ayni paytda 21ta lavozim vakant ekanini aytib o‘tdi. Qo‘mita mulozimidan so‘nggi ikki oyda necha kishi ishdan bo‘shagani haqida qayta-qayta so‘ralgan bo‘lsa-da, ushbu savol ochiq qoldirildi.

«Yil boshidan hisoblaydigan bo‘lsak, turli lavozimdagi 25 nafar xodimimiz ishdan bo‘shagan, lekin shu paytda 21 nafar xodimni ishga oldik. Bu juda normal holat, bu jarayon davomiy bo‘ladi, chunki kimdir keladi, kimdir ketadi. Bugungi kunda vakant lavozimlarga tanlov bir nechta bosqichlardan iborat va albatta xodimlarni tanlash jarayoni birmuncha vaqt talab qiladi. O‘rtacha bunga 1 oydan 1,5 oygacha vaqt talab qilinyapti.

Hozirgi kunda bizda beshta rahbarlik o‘rni vakant hisoblanadi. Bundan tashqari, mutaxassislar, texnik xodimlar, shu jumladan, bugundan boshlab (intervyu 1 noyabr kuni olingan – tahririyat) axborot xizmati (3ta ish o‘rni) ham vakant hisoblanadi. Ayni paytda jami 21ta vakant lavozimlar bor», deydi qo‘mita raisi o‘rinbosari.

Farrux Qoraboyev garchi xodimlar ommaviy ravishda ishdan ketayotganini rad etayotgan, xodimlarning boshqa ishga o‘tayotganini tabiiy deb aytayotgan bo‘lsa-da, 84ta shtat birligidan iborat qo‘mitada xodimlarning to‘rtdan bir qismi yo‘q ekanini normal holat deya qabul qilish qiyin. Qolaversa, bir mehnat jamoasidan o‘nlab xodimlar yoppasiga tark etishi va bu keng jamoatchilikka namoyish etilishi qo‘mitada ichki muhit rais o‘rinbosari aytgandek barqaror emasligiga ishora qilmoqda.

Avvalroq Kun.uz o‘z manbalariga tayanib Monopoliyaga qarshi kurashish qo‘mitasidagi ichki kelishmovchiliklar sabab ko‘plab xodimlar o‘z lavozimlarini tark etishgani, hozirgi paytda qo‘mitada 10ga yaqin rahbarlik lavozimi vakant ekani haqida yozgandi.