Toshkent viloyatidagi xonadonlardan birida sherlar boqilayotgani ma'lum bo‘ldi 

Toshkent viloyatidagi xonadonlardan birida sherlar boqilayotgani ma'lum bo‘ldi. Bu haqda ekologiya bo‘yicha xabarlarni yoritib beruvchi Ekologuz telegram kanalida xabar qilindi.

Qayd etilishicha, kanalga kelib tushgan xabarda Toshkent viloyatining Parkent tumanida xususiy xonadonda sherlar boqilayotgani haqida aytilgan. Kanal ma'muriyati, “Mehr va oqibat” hayvonlarni himoya qilish NNT vakili va Parkent tuman Ekologiya boshqarmasi vakillari sherlarni borib ko‘rgan.

“Krasnogorsk shaharchasidan chiqib ketaverishda dala hovlilar bor ekan. Shularning birida ikkita sher (erkak va urg‘ochisi) va ularning bolasi boqilmoqda. Sherlar tor, qorong‘i yerto‘lasimon joyda saqlanar ekan. Bolachasining bir ko‘zi parda bilan qoplangan. U ota-onasidan ajratib olingan. 

Uy egasining aytishicha, sherlarning barcha hujjatlari mavjud (ammo ularni ko‘rmadik). Andijon hayvonot bog‘idan sotib olingan va Krasnogorskda xususiy hayvonot bog‘ini ochish uchun harakatida ekan. Ammo hali bog‘ga yer ajratilmagan. Sherlarning qorni to‘qdir balki, ammo 2 yildan buyon qorong‘i joyda saqlanayotgan sherlarni ko‘rib, yuragim ezilib ketdi. Hayvonot bog‘i ochilgan taqdirda ham bor budini bugungi kunda sherlarning qornini to‘ydirishga sarflayotgan oila a'zolari undan qanchalik daromad ola olishadi?” deyiladi e'lon qilingan xabarda.

Kanaldagi ma'lumotda Ekologiya qo‘mitasi va Ekopartiya hayvonlar taqdiriga befarq bo‘lmaslikka chaqirilgan.

“Hayvonot bog‘i ochilgunga qadar (qachon ochilishi noma'lum) sherlar tor qafasda qanchagacha yashashadi? Kelayotgan qish kunlarida ularning kasal bo‘lishi tabiiy, chunki yerto‘la polida somon ham yo‘q edi. Shervachchaning ko‘zini esa zudlik bilan veterinarga ko‘rsatish lozim. Eng maqbuli, xususiy hayvonot bog‘ini ochishga bel bog‘lagan fuqaro yer olib, bog‘ni ochgunicha, hayvonlarni Toshkent hayvonot bog‘iga ko‘chirish kerak. Hayvonlar taqdiriga Ekologiya qo‘mitasi va Ekopartiya ham befarq qolishmas, degan umiddamiz”, deyiladi xabarda.

Avvalroq, Qoraqalpog‘istondagi yagona hayvonot bog‘i yopilib ketish arafasida ekani xabar qilingandi.