Ijtimoiy tarmoqlarda Bandixon tumani Saroy mahallasi «Obod mahalla» dasturiga kiritilgani, ammo yaroqsiz holga kelgan simyog‘ochlarni almashtirish masalasida qilingan murojaatlar e'tiborsiz qolayotgani haqida xabarlar tarqaldi. Bandixon tumani hokimligi xabarlar bo‘yicha munosabat bildirdi.
Munosabatda ma'lum qilinishicha, Bandixon tumani Saroy mahallasidagi yaroqsiz simyog‘ochlarni almashtirib berishni so‘rab qilingan murojaat ishchi guruh tomonidan o‘rganilgan.
«Saroy mahallasida 4698 nafar aholi istiqomat qiladi. Tuman mutasaddilarining ma'lumotlariga ko‘ra, Saroy mahallasida 2021 yil «Obod mahalla» davlat dasturi doirasida Bandixon tuman elektr tarmoqlari korxonasi tomonidan Bandixon TETK PS Paxtakor F-1 TP-181ga qo‘shimcha 160 kVA transformator hamda 1,8 km 0,4kV elektr uzatish tarmog‘i qurilishi rejaga kiritilgan. Hozirgi kunda qurilish-montaj ishlari davom etmoqda», deyiladi munosabatda
Qayd etilishicha, murojaatda keltirilgan hudud mahallaning tarqoq manzillaridan biri hisoblanib, qurilish-montaj ishlari tugallangandan so‘ng rekonstruksiyadan chiqarilgan foydalanishga yaroqli tayanch ustun va elektr simlari murojaatchilar ta'kidlagan manzil bo‘yicha o‘rnatib beriladi.
