Qarshidagi mahallada «Obod mahalla» dasturi doirasida 2018 yilda qilinishi lozim bo‘lgan ishlar qachon tugaydi?

Kun.uz’ga navbatdagi murojaat Qarshi shahrida joylashgan Otchopar mahallasidan bo‘ldi. Ushbu mahallada yashovchi Begzod Sattorov bir guruh fuqarolar nomidan bugun mahalla ahlini qiynayotgan muammolarni bayon qildi.

B.Sattorovning ma'lum qilishicha, Otchopar mahallasi mustaqillik yillarida Qarshi shahri chetida shakllangan katta mahallalardan biri hisoblanadi. Bu yerda turli infratuzilma masalalari, shuningdek, maktab, bog‘cha kabi ijtimoiy binolarning qurilishiga uzoq yillar davomida panja orasidan qarab kelingan.

Ko‘chalarni asfalt qilish u yoqda tursin shag‘al ham to‘kilmagan, ichimlik suvi hamda elektr tarmoqlari tortilmagan, maktab va bog‘cha qurilishi masalasida muammolar bo‘lgan.

Mahalla 2018 yilda «Obod mahalla» dasturiga tushganda odamlar o‘zlarini qiynab kelayotgan masalalar hal qilinishiga umid qilib xursand bo‘lgan. Ammo o‘sha yili dastur bo‘yicha belgilangan ishlarning choragi ham bajarilmagan. Jumladan, mahallada qurilishi belgilangan maktab qurilmagan. Ko‘chalar asfalt qilinmagan. Loy ko‘chalarga shag‘al to‘kib berilmagan. Suv tarmoqlari tortilmagan.

Shundan so‘ng, mahalla ahli turli tashkilotlarga davlat dasturida belgilangan ishlarni tugallab berishlarini so‘rab murojaat qilgan. Ularga 2018 yilda «Obod mahalla» dasturi bo‘yicha chala qolgan ishlar 2019 yilda qilib berilishi aytilgan. Ammo 2019 yilda ham hech ish qilinmagan.

Mahalla ahli chala qoldirib ketilgan ishlarni bitirib berishini so‘rab, turli mutasaddi tashkilotlar eshigida sarg‘ayib yurganda Kun.uz’ga ham murojaat qilgan va ularni qiynab kelayotgan muammolar saytda bir necha marta yoritilgan.

Jumladan, 2019 yil dekabr oyida aholi tomonidan qilingan murojaatni o‘rganish uchun borgan muxbirlar Otchopar mahallasida odamlarni qiynab kelayotgan muammolarga guvoh bo‘lgandi. O‘shanda mahallada yashovchilarning farzandlari maktab yo‘qligi uchun 3-4 kilometrgacha loy kechib, qo‘shni mahalla hududidagi maktabga qatnayotgan, ko‘chalarga esa shag‘al deb yarmidan ko‘pi tuproq bo‘lgan yer jinsi to‘kilgandi.

Shuningdek, mahallaning markaziy ko‘chasi asfalt qilinmagani uchun u yerga avtobus qatnovi yo‘lga qo‘yilmagan, kira qiladigan «Damas»lar va taksilar kirmas, oqibatda odamlar katta yo‘l yoqasida tushib, uyigacha loy kechib borishga majbur bo‘lardi. Oradan ikki yil o‘tdi, xo‘sh, mahallada nimalar o‘zgardi? Chala qolib ketgan ishlar qilindimi?

Murojaatchi B.Sattorovning aytishicha o‘tgan ikki yilda mahalla ahli tinimsiz ravishda muammolarni hal qilib berishni so‘rab mutasaddi tashkilotlarga murojaat qilishda davom etgan. Natijada mahallada yangi 528 o‘rinli maktab qurilgan. Markaziy ko‘chaga asfalt yotqizilgan, ammo bir qismi chala qoldirib ketilgan.

Markaziy ko‘cha oxirigacha asfalt qilinmagani uchun bugun kira qiladigan mashinalar hanuzgacha mahalla ichiga kirmayapti. Oqibatda odamlar katta ko‘chaga chiqquncha yana qiynalyapti. Bundan tashqari, mahallaga ichimlik suvi tarmoqlarini tortish ishlari chala qolgani uchun bugun odamlar suvni sotib olishga majbur bo‘lyapti.

«Ichimlik suvi tarmoqlarini tortish chala qolib ketdi. Mahallada yashovchilar kimdir o‘z hovlisida betondan hovuz yasagan, kimdir temir yoki polietilendan tayyorlangan suv saqlovchi idish olgan. Bir mashina suvni 100 ming so‘mga sotib olib, o‘sha joyga quydiramiz. Ana shu suvni ba'zi oilalar ikki haftada tugatsa qo‘li kaltaroq oilalar tejab olti oy ishlatadi. Suv maxsus joyda qurtlab ketgan holatlar ham bo‘lgan», deydi murojaatchi.

Mazkur maqola yozilishi arafasida Qarshi tuman hokimligi mahalla ahli tomonidan ijtimoiy tarmoqlarda tarqatilgan 2018 yilda davom ettirilgan «Obod mahalla» dasturi doirasida davom ettirilishi lozim bo‘lgan ishlar 2022 yilning ostonasida ham qoniqarli bajarilmagani aytilgan xabarlar yuzasidan munosabat bildirdi.

Munosabatda ma'lum qilinishicha, Otchopar mahallasining Mustaqillik ko‘chasiga joriy yilda hashar yo‘li bilan to‘liq shag‘al yotqizilgan. Ko‘chaga asfalt qoplamasi yotqizish masalasini 2022 yil manzilli dasturiga kiritish bo‘yicha takliflar berilgan.

«Qo‘shimcha tarzda shuni ma'lum qilamizki, joriy yilda davlat dasturiga asosan Otchopar mahallasidagi 14 kilometr ichki yo‘llarga asfalt qoplamasi yotqizildi. Ichki yo‘llarni ta'mirlash ishlari 2022 yilda ham davom etadi», deyiladi munosabatda.

Murojaatchi B.Sattorovning bildirishicha joriy yilda haqiqatan mahallaning ichki ko‘chalariga asfalt yotqizilgan. Ammo mahallaning asosiy ko‘chasi qolib ketib, uning chekka qismlarida yuqoriroq lavozimda ishlaydigan shaxslar, deputatlar kabilarning uylari joylashgan ko‘chalar asfalt qilingan.