Ijtimoiy tarmoqlar bloklanishiga qarshi murojaat rad etildi

O‘zbekistonda ijtimoiy tarmoqlar bloklanishiga sabab bo‘layotgan “Shaxsga doir ma'lumotlar to‘g‘risida”gi qonunning 27-1-moddasini bekor qilishni so‘rab yuborilgan jamoaviy murojaatni veb-portalga joylashtirish rad etildi.

“Mening fikrim” jamoaviy murojaatlar portali moderatori qabul qilingan paytidan bir yil muddat o‘tmagan hujjatga doir masala portalga joylashtiriladigan murojaatning predmeti bo‘lishi mumkin emasligini bildirgan.

“Mening fikrim” veb-portali orqali elektron jamoaviy murojaatlar berish va ularni ko‘rib chiqish tartibi to‘g‘risida”gi Nizomning 11-bandida “mazmuni va ma'nosiga ko‘ra veb-portalga kelib tushgan, joylashtirilgan murojaatlarga o‘xshash bo‘lgan yoxud qabul qilingan paytidan e'tiboran bir yillik muddat o‘tmagan, vakolatli davlat organining qarori qabul qilib bo‘lingan” murojaat “Mening fikrim” veb-portaliga joylashtiriladigan murojaatning predmeti bo‘lishi mumkin emas.

Ya'ni, mazkur qoidaga muvofiq, Sizning 746-s-p/21-sonli murojaatingizda bildirilgan O‘zbekiston Respublikasining “Shaxsga doir ma'lumotlar to‘g‘risida”gi Qonunining 27-1-moddasi (O‘zbekiston Respublikasi fuqarolarining shaxsga doir ma'lumotlariga ishlov berishning alohida shartlari)ni bekor qilish haqidagi taklifingiz 2021 yilning 16 aprelidan kuchga kirgan bo‘lib, mazkur masala u kuchga kirgan sanadan e'tiboran bir yillik muddat o‘tgandan so‘ng “Mening fikrim” veb-portalida ko‘rib chiqiladi. Shu munosabat bilan, murojaatingiz “Mening fikrim” veb-portaliga joylashtirilmasligi ma'lum qilinadi”, – deyiladi moderator javobida.

Eslatib o‘tamiz, O‘zbekistonda 2019 yil 1 oktyabrdan “Shaxsga doir ma'lumotlar to‘g‘risida”gi qonuni kuchga kirgan . 2021 yil 14 yanvarda Vazirlar Mahkamasi huzuridagi Davlat personallashtirish markazining tashabbusi bilan qabul qilingan qonun asosida hujjatga bahsli 27-1-modda qo‘shilgan. Xorijdagi internet platformalaridan O‘zbekiston fuqarolarini shaxsiy ma'lumotlari joylashtirilgan serverlari olib kelishni talab qilayotgan ushbu modda 2021 yil 16 apreldan kuchga kirgan.

Joriy yil 4 noyabr kuni portal tomonidan ekspertiza uchun qabul qilingan murojaatda aynan o‘sha, “Shaxsga doir ma'lumotlar to‘g‘risida”gi qonunining 27-1-moddasini keng jamoatchilik tomonidan muhokama qilinmasdan qabul qilingani, uning iqtisodiy va siyosiy oqibatlari hisoblab chiqilmagani hamda so‘nggi kunlarda jamoatchilikning qattiq noroziligiga sabab bo‘lgani tufayli bekor qilish so‘ralgan edi.

Ayni vaqtda ushbu qonun talablari ko‘plab xalqaro kompaniyalar tomonidan bajarilmagani ortidan O‘zbekistonda Twitter, TikTok, Skype, WeChat va Vkontakte tarmoqlari yarim yildan buyon blokda.

3 noyabr kuni Teleram, Facebook, YouTube, Instagram va Odnoklassniki tarmoqlari ham bloklandi. Biroq bir necha soatdan keyin bu harakat prezident bilan kelishilmay qilingani aytildi va bloklar olib tashlandi. Biroq avvalroq cheklov qo‘yilgan beshta platformaga hamon VPN'siz kirish imkonsiz.