Yuridik shaxslarga vaqtinchalik birlashmalar tuzish huquqi beriladi

Prezidentning “Korporativ munosabatlarning huquqiy asoslarini yanada takomillashtirish chora-tadbirlari haqida”gi qarori loyihasi e'lon qilindi.

Yuridik shaxslarga O‘zbekistonda konsorsium shartnomasiga muvofiq vaqtinchalik birlashmalar tuzish huquqi beriladi.

Belgilanishicha:

• konsorsium shartnomasi faqat tijoratchi tashkilot bo‘lgan yuridik shaxslar o‘rtasida aniq bir xo‘jalik vazifalarini bajarish va ishtirokchilar faoliyatini muvofiqlashtirish uchun tuziladi;
• konsorsium shartnomasi tuzish va konsorsiumga yangi ishtirokchini qabul qilish faqat Monopoliyaga qarshi kurashish qo‘mitasi hududiy bo‘linmalarining raqobat to‘g‘risidagi qonunchilik talablariga rioya etilishi yuzasidan xulosasi olinganidan keyin amalga oshiriladi;
• konsorsium o‘z maqsadiga resurslarni birlashtirish va muayyan harakatlarni birgalikda bajarish orqali erishadi;
• konsorsium ishtirokchilari uning faoliyati bilan bog‘liq majburiyatlar bo‘yicha solidar javobgar bo‘ladi;
• vaqtinchalik birlashma yuridik shaxs hisoblanmaydi.

2022 yil 1 iyuldan boshlab shunday tartib o‘rnatiladiki, unga muvofiq davlat ulushi 50 foiz va undan yuqori bo‘lgan davlat ishtirokidagi korxonalarning ijro etuvchi organi rahbari lavozimiga korporativ boshqaruv malaka attestati mavjud bo‘lgan shaxslar saylanishi (tayinlanishi) mumkin.

Iqtisodiy taraqqiyot va kambag‘allikni qisqartirish vazirligi Davlat aktivlarini boshqarish agentligi bilan birgalikda talabgorlarni Biznes va tadbirkorlik oliy maktabida o‘qitish bo‘yicha maxsus o‘quv dasturlarini tasdiqlash choralarini ko‘radi.