Qarshida harakatlanib ketayotgan «Gazel» yuk mashinasida yong‘in sodir bo‘ldi

Qarshi shahridagi ko‘chada harakatlanib ketayotgan Gazel» yuk mashinasida yong‘in sodir bo‘lgan. Bu haqda viloyat Favqulodda vaziyatlar boshqarmasi axborot xizmati xabar bermoqda.

Ma’lum qilinishicha, 2021 yil 16 dekabr kuni soat 17:02larda 101 qisqa raqami orqali Qarshi shahar FVBga shaharning Alisher Navoiy ko‘chasida harakatlanib kelayotgan «Gazel» yuk mashinasida yong‘in sodir bo‘layotgani to‘g‘risida xabar kelib tushgan.

Xabarga ko‘ra, yong‘in sodir bo‘lgan joyga Qarshi shahar FVBdan bitta yong‘in-qutqaruv bo‘linmasi yetib borgan. Yong‘in soat 17:14larda to‘liq o‘chirilgan. Yong‘in oqibatida mashinaning motor va old salon qismi zararlangan.

Dastlabki surishtiruvda ushbu mashina «O‘ztelekom» AJning Qashqadaryodagi bo‘limiga qarashli ekani va uni Qarshi tumani «Dasht» QFYda yashovchi 1979 yilda tug‘ilgan fuqaro J.R. boshqarib ketayotgani aniqlangan.

Yong‘inda hech kim tan jarohati olmagan. Hozirda yong‘in sababi va zarari o‘rganilmoqda.