«Tolibon» Afg‘onistonda talabalar uchun universitetlarni qayta ochishga ruxsat berdi

Afg‘onistonning bir qancha viloyatlaridagi universitetlarda darslar 2 fevraldan tiklanadi. Bu haqda mamlakatda hokimiyatni egallab olgan «Tolibon» harakati tomonidan tayinlangan muvaqqat hukumatdagi Oliy ta’lim vazirligi rahbari Abdul Boqi Haqqoniy yakshanba kuni vazirlikning Facebook sahifasida e’lon qilingan videomurojaatida ma’lum qildi.

«Iqlimi issiq bo‘lgan viloyatlardagi barcha oliy ta’lim muassasalarida darslar dalva oyining 13-sanasidan (2 fevral) tiklanadi. Sovuq iqlimi bo‘lgan viloyatlarda darslar xut oyining 7-sanasidan (26 fevral) boshlanadi», dedi «Tolibon» vakili. U qizlarning darslarga kiritilishiga aniqlik kiritmagan.

«Hammaga o‘tish davri uchun uch hafta vaqt beriladi, shundan so‘ng har bir universitetda imtihonlar o‘tkaziladi va shundan keyingina yangi semestr boshlanadi», — deya qo‘shimcha qildi Haqqoniy. 

Afg‘onistonda issiq iqlimi bo‘lgan viloyatlar: Nangarhor, Qandahor, Nimroz, G‘ilmond, Xost, Paktiya, Paktika va Lagmon. 

Afg‘oniston universitetlari va maktablarida darslar o‘tgan yilning avgust oyi oxirida, «Tolibon» tomonidan mamlakatda hokimiyat egallab olinishi ortidan to‘xtatilgan edi. Kichik maktablar 19 sentyabr kuni qayta ochildi, biroq faqat o‘g‘il bolalar va erkak o‘qituvchilarga o‘qishga ruxsat berildi. 

Toliblar keyinroq maktab va oliy o‘quv yurtlarida sinflar hamda xonalarni bo‘lish va o‘qituvchilarni taqsimlash bo‘yicha tayyorgarlik ishlari yakunlanganidan keyingina qizlar o‘quv jarayoniga qabul qilinishiga aniqlik kiritdi.